Tramp Iran men AQSh «jaqsy kelissózder júrgizdi» dep málimdedi
ASTANA. KAZINFORM — AQSh prezıdenti Donald Tramp Aq úı Iranmen qaqtyǵysty dıplomatııalyq jolmen retteý múmkindigine optımızmmen qarap otyrǵanyn rastady, dep habarlaıdy BBC.
— Olar kelisim jasaǵysy keledi. Sońǵy 24 saǵatta biz óte jaqsy kelissózder júrgizdik jáne kelisimge kelýimiz ábden múmkin, — dedi ol jýrnalısterge.
Tramptyń aıtýynsha, Iran ıadrolyq qarýǵa ıe bolmaýǵa kelisim bergen jáne basqa da sharttardy qabyldaǵan.
Alaıda Iran tarapy bul málimdemeni rastamady.
AQSh prezıdenti amerıkalyq BAQ jazǵan 30 kúndik kelisimge kelý merzimi qatań emes ekenin de atap ótti. Jýrnalısterdiń suraǵyna jaýap bergen ol «eshqandaı naqty dedlaın joq» ekenin aıtty.
Buǵan deıin Axios basylymy AQSh ákimshiligi Iranmen soǵysty toqtatýǵa jáne Tegerannyń ıadrolyq baǵdarlamasy boıynsha kelesi kelissózderge negiz bolatyn ózara túsinistik jónindegi bir paraqtyq memorandýmǵa jaqyndaǵanyn habarlaǵan bolatyn. Bul aqparat eki amerıkalyq sheneýnikke jáne taǵy eki derekkózge silteme jasaı otyryp jarııalanǵan.
Basylym málimetinshe, Vashıngton Irannyń negizgi birneshe tarmaq boıynsha jaýabyn 48 saǵat ishinde kútip otyr. Derekkózder ázirge eshteńe bekitilmegenin, biraq bul protsess soǵys bastalǵannan bergi eń ilgeri kezeń ekenin aıtqan.
Qaqtyǵys 28 aqpanda AQSh pen Izraıldiń Iranǵa jasaǵan birlesken soqqylarynan keıin bastalǵan.
Qujat jobasy 14 tarmaqtan turady jáne ony AQSh prezıdentiniń arnaıy ókili Stıv Ýıtkoff pen Donald Tramptyń kúıeý balasy Djared Kýshner ırandyq sheneýniktermen tikeleı jáne deldaldar arqyly birge ázirlep jatyr.
Memorandým aımaqtaǵy soǵystyń aıaqtalǵanyn jarııalap, Ormýz buǵazyn ashý, Irannyń ıadrolyq baǵdarlamasyn shekteý jáne AQSh sanktsııalaryn alyp tastaý boıynsha 30 kúndik kelissózder kezeńin bastaýdy kózdeıdi.
