Tramp Iran kelissózge oralmasa, kópirlerin tas-talqan etetinin eskertti
ASTANA. KAZINFORM – AQSh prezıdenti Donald Tramp eger Tegeran kelissózderge qaıta oralmasa, kelesi aptada Irannyń kópirleri men elektr stantsııalaryna soqqy jasalýy múmkin ekenin málimdedi. Bul týraly ol Fox News telearnasyna bergen suhbatynda aıtty, dep habarlaıdy VVS.
Tramp buǵan deıin Ormýz buǵazy arqyly ótetin barlyq júkke 20 paıyzdyq alym engizý josparynan bas tartqanymen, Iran porttaryna teńiz blokadasyn qaıta engizetinin jarııalaǵan.
– Kelesi apta olar úshin óte aýyr bolady. Eger kelissóz ústeline qaıta oralyp, mámilege kelmese, barlyq elektr stantsııalaryn isten shyǵaramyz. Barlyq kópirlerin qıratamyz, – dedi AQSh prezıdenti.
Aıta keteıik, Tramp sáýir aıynda da Irannyń azamattyq ınfraqurylymyna, sonyń ishinde kópirler men elektr stantsııalaryna soqqy jasaý múmkin ekenin málimdegen.
Sol kezde BUU-nyń Adam quqyqtary jónindegi joǵarǵy komıssary Folker Tıýrk halyqaralyq quqyqqa sáıkes beıbit turǵyndar men azamattyq ınfraqurylym nysandaryna qasaqana shabýyl jasaý áskerı qylmys sanalatynyn eskertken edi.
1949 jylǵy Jeneva konventsııalarynda da beıbit halyqtyń ómiri úshin asa mańyzdy nysandarǵa soqqy jasaýǵa tyıym salynǵan.
Alaıda seısenbi kúni keshke Special Report with Bret Baier baǵdarlamasyna bergen suhbatynda Tramp Irannyń energetıkalyq ınfraqurylymy AQSh shabýyldarynyń yqtımal nysandarynyń biri bolyp qala beretinin taǵy da aıtty.
– Energetıkalyq nysandardy eń sońyna qaldyramyn. Biraq aqyr sońynda olarǵa da soqqy jasaımyz, – dedi ol.
Tramptyń aıtýynsha, seısenbi kúni keshke amerıkalyq kelissóz júrgizýshiler Iran jaǵyna qatań eskertý jetkizgen.
– Olarǵa kelisimge kelgen durys. Áıtpese olarda eshteńe qalmaıdy, – dedi AQSh prezıdenti.
Aıta keteıik, munyń aldynda Tramp Iran oǵan qastandyq jasasa, tutas eldi joıyp jiberetinin málimdegen-di.
Al búgin AQSh prezıdenti halyqqa úndeý jasaıdy.
