Tramp: Iran qarymta shabýyl jasasa, AQSh «áldeqaıda aýqymdy» soqqy beredi
ASTANA. KAZINFORM – AQSh Prezıdenti Donald Tramp Iran qarýly kúshteri jaýap qaıtarǵan jaǵdaıda el aýmaǵyna «budan da aýqymdy» soqqy jasalatynyn málimdedi. Bul týraly Anadolý agenttigi jazdy.
Tramp áleýmettik jelidegi jazbasynda AQSh-tyń Iranǵa jańa soqqylar jasap jatqanyn habarlady.
– Qazir AQSh Ormýz buǵazy mańyndaǵy Iran nysandaryna soqqy jasap jatyr. Bul soqqylar – aýqymdy ári qýatty, – dedi ol.
AQSh prezıdentiniń aıtýynsha, bul shabýyldar Irannyń Ormýz buǵazyna qaıtadan teńiz mınalaryn ornalastyrý áreketine, sondaı-aq Iordanııadaǵy amerıkalyq bazaǵa segiz zymyran ushyrýyna jaýap retinde jasalǵan.
Sondaı-aq Tramp Tegerandy jaýap áreketterinen bas tartýǵa shaqyrdy.
– Eger Iran memleketi osy tolyq negizdelgen soqqyǵa jaýap berýge sheshim qabyldasa, oǵan budan da joıqyn ári aýqymdy soqqy jasalady, – dedi ol.
Tramptyń sózinshe, Iranǵa qarsy «eń iri» shabýyl áli jasalǵan joq jáne mundaı soqqy elge orasan zor zalal keltirýi múmkin.
Buǵan deıin AQSh Ortalyq qolbasshylyǵy (CENTCOM) X áleýmettik jelisinde Islam revolıýtsııasy saqshylar korpýsynyń nysandaryna shabýyl bastalǵanyn habarlady. Málimdemede buǵan Irannyń Ormýz buǵazyndaǵy saýda kemelerine jáne aımaqtaǵy amerıkalyq qyzmetkerlerge «shabýyl jasaý áreketteri» sebep bolǵany aıtylǵan.
Iran qarýly kúshteri de AQSh-tyń shabýyldaryna jaýap qaıtaratynyn málimdedi.
Eske sala ketsek, buǵan deıin habarlaǵanymyzdaı, AQSh Irandaǵy Islam revolıýtsııasy saqshylar korpýsy nysandaryna shabýyl bastaǵan edi.
Sondaı-aq Ormýzdaǵy shıelenis saldarynan 400 keme men 6 myń teńizshi Parsy shyǵanaǵynan shyǵa almaı otyrǵanyn jazdyq. Halyqaralyq teńiz uıymynyń málimetinshe, qaqtyǵys bastalǵaly halyqaralyq keme qatynasyna keminde 70 shabýyl jasalyp, 19 teńizshi qaza tapqan.
Sondaı-aq AQSh pen Iran arasyndaǵy soǵysqa alty aı tolǵanyn jáne qaqtyǵys nege tyǵyryqqa tirelgenin saralap kórdik.
Al dúıchenbi kúni AQSh birneshe aptadan beri alǵash ret Iranǵa shabýyl jasaǵany habarlandy. IRSK bul shabýyl Amerıkanyń Larak aralyna bergen soqqylaryna jaýap ekenin málimdedi. AQSh ókili jeksenbi kúni AQSh áskerı kúshteri Irannyń Larak aralyndaǵy ushyrý qondyrǵylaryna soqqy bergenin rastady. Bul shilde aıynyń sońynan bergi amerıkalyqtardyń Iranǵa jasaǵan alǵashqy shabýyly.
