Tramp Iran baǵytyna amerıkalyq «armada» jiberiletinin málimdedi
ASTANA. KAZINFORM – Iran tóńiregindegi áskerı-saıası ahýal Vashıngtonnan aıtylǵan qatań málimdemeler aıasynda qaıtadan ýshyǵa tústi, dep habarlaıdy Kazinform agenttiginiń menshikti tilshisi.
AQSh prezıdenti Donald Tramp Iran baǵytyna áskerı-teńiz «armadasy» jiberilip jatqanyn málimdep, sonymen birge ony qoldanýǵa qajettilik týyndamaıdy dep úmittenetinin aıtty. Bul týraly ol beısenbi kúni Davosta ótken Dúnıejúzilik ekonomıkalyq forýmǵa qatysqannan keıin AQSh-qa qaıtyp kele jatqan jolda Air Force One ushaǵynyń bortynda jýrnalısterge habarlady.
Reuters agenttiginiń amerıkalyq resmı tulǵalarǵa silteme jasap habarlaýynsha, aldaǵy kúnderi Taıaý Shyǵysqa USS Abraham Lincoln áýe kemesin tasymaldaýshysy jáne basqarylatyn zymyrandyq qarýmen jabdyqtalǵan birneshe esmınets jiberiledi.
Sonymen qatar Iran tarapynan yqtımal soqqy qaýpi týyndaǵan jaǵdaıda aımaqtaǵy amerıkalyq áskerı bazalardy qorǵaý úshin qosymsha áýe shabýylyna qarsy qorǵanys júıelerin ornalastyrý múmkindigi de qarastyrylyp jatyr.
Eske salaıyq, buǵan deıin Iran Islam Respýblıkasyna qarsy agressııa jasalǵan jaǵdaıda Taıaý Shyǵystaǵy amerıkalyq bazalarǵa soqqy beretinin eskertken bolatyn.
– Ol jaqqa kóptegen kemeler baǵyt alyp bara jatyr, saqtyq úshin. Men eshteńe bolǵanyn qalamaımyn, biraq jaǵdaıdy óte muqııat baqylap otyrmyz, – dedi Tramp.
Keıinirek ol:
– Bul baǵytta qozǵalyp kele jatqan armadamyz bar, bálkim, ony qoldanýdyń da qajeti bolmaı qalar, – dep qosty.
Halyqaralyq BAQ málimetinshe, kúshterdiń bul qozǵalysy Taıaý Shyǵystaǵy amerıkalyq nysandardy qorǵaýdy kúsheıtýge de, qajet bolǵan jaǵdaıda qosymsha áskerı áreketter jasaýǵa da múmkindik beredi. Maýsym aıynda AQSh Irannyń ıadrolyq baǵdarlamasynyń negizgi nysandaryna soqqy jasaǵan edi.
Áskerı kemeler ótken aptada Azııa-Tynyq muhıty óńirinen qozǵala bastaǵan. Bul Vashıngton men Tegeran arasyndaǵy qarym-qatynastyń sońǵy aılarda Irandaǵy narazylyqtardyń qatań basyp-janshylýynan keıin kúrt shıelenisýimen tuspa-tus keldi. Tramp buǵan deıin narazylyq bildirýshilerdiń ólimine jaýap retinde aralasý qaýpin birneshe ret aıtqanymen, ótken aptada rıtorıkasyn jumsartyp, ólim jazalarynyń toqtatylǵanyna qol jetkizgenin málimdegen.
Beısenbi kúni ol bul málimdemesin qaıta qaıtalap, onyń qoqan-loqqysynan keıin Iranda shamamen 840 ólim jazasynyń kúshi joıylǵanyn aıtty.
– Men olarǵa eger bul adamdardy darǵa assańdar, senderge buryn-sońdy bolmaǵan soqqy jasalady dedim. Bul senderdiń ıadrolyq baǵdarlamalaryńa jasalǵan soqqylardy túkke turǵysyz etip kórsetedi, – dedi Tramp.
– Sol qorqynyshty jaǵdaı bolardan bir saǵat buryn olar jazalardy toqtatty, – dep qosty ol, muny «jaqsy belgi» dep baǵalady.
Amerıkalyq áskerıler buǵan deıin de shıelenis kúsheıgen kezeńderde Taıaý Shyǵystaǵy qatysýyn arttyryp otyrǵan, ádette bul qorǵanys maqsatynda jasalatyn. Alaıda ótken jyly AQSh Irannyń ıadrolyq ınfraqurylymyna maýsym aıynda soqqy jasar aldynda aımaqqa aýqymdy kúshterin kóshirgen edi.
Tramp AQSh Tegeran ıadrolyq baǵdarlamasyn qaıta jandandyrýǵa árekettense, kúsh qoldanýǵa daıyn ekenin atap ótti.
Aıta keteıik, keshe Iran bıligi eldegi narazylyqtar kezinde qaza tapqandardyń sanyn alǵash ret resmı túrde jarııalady.