Tramp Indonezııamen kelisimge keldi

ASTANA. KAZINFORM — AQSh prezıdenti Donald Tramp Indonezııamen 19 paıyzdyq baj salyǵyn tóleıtin tıimdi saýda kelisimin jarııalady, dep habarlaıdy Kazinform tilshisi.

— Indonezııa AQSh-qa eksporttaıtyn barlyq taýarǵa 19% tarıf tóleıdi, al AQSh-tan Indonezııaǵa eksport tarıftik jáne tarıftik emes kedergilerge ushyramaýy tıis, — dep habarlady Donald Tramp Truth Social-ǵa jazǵan málimdemesinde.

Indonezııa tóleıtin tarıf joǵary baj salyǵy bar elderden keletin tranzıttik taýarlarǵa qosylady, dep túsindirdi Aq úı basshysy.

— Bul mańyzdy kelisim tarıhta alǵash ret búkil Indonezııa naryǵyn Amerıka Qurama Shtattaryna ashady. Tarıhta birinshi ret bizdiń fermerler jáne balyqshylar 280 mıllıonnan astam halqy bar Indonezııa naryǵyna tolyq qol jetkize alady, — dedi Tramp.

Sondaı-aq kelisim boıynsha Indonezııa AQSh-tyń 15 mıllıard dollarǵa energııa kózin, 4,5 mıllıard dollarǵa AQSh-tyń aýylsharýashylyq ónimderin jáne 50 Boeing ushaǵyn satyp alýǵa mindettendi.

AQSh Saýda mınıstrliginiń málimeti boıynsha, eki el arasyndaǵy saýda 2024 jyly 38 mıllıard dollardan asty. Ótken jyly AQSh-tyń Indonezııamen saýda tapshylyǵy 17,9 mıllıard dollardy qurady.

Buǵan deıin AQSh Vetnammen saýda kelisimine qol qoıǵany habarlanǵan bolatyn.