Tramp ınaýgýratsııadan keıin alǵashqy jarlyqtarǵa qol qoıdy
ASTANA. KAZINFORM – AQSh-tyń jańa prezıdenti Donald Tramp óz baǵdarlamasyn jedel júzege asyrý maqsatynda Aq úıde birneshe jarlyqqa qol qoıdy, dep habarlaıdy Kazinform menshikti tilshisi.
Tramptyń birinshi jarlyǵy burynǵy prezıdent Djo Baıden qol qoıǵan 80-ge jýyq atqarýshylyq aktilerdi joıdy, sonyń ishinde klımattyq kelisim, genderlik sáıkestik belgisi boıynsha kemsitý jáne Dúnıejúzilik densaýlyq saqtaý uıymynan shyǵý bar, dep habarlaıdy NBC News.
Immıgratsııalyq máseleni sheshý aıasynda Tramp óziniń alǵashqy ákimshiligi kezinde qyzmet etken, Meksıkadan AQSh-qa zańsyz kirýge árekettengender úshin «Meksıkada qalyńyz» saıasatyn qalpyna keltirdi. Taǵy bir qaýly kartelder men qylmystyq toptardy, onyń ishinde zańsyz mıgranttardy alyp ótýmen aınalysatyndardy sheteldik terrorıstik uıymdar retinde anyqtaıdy.
Tramptyń shekarada tótenshe jaǵdaı jarııalaýy AQSh Qorǵanys mınıstrligine armııa men ulttyq gvardııany shekaraǵa jiberýge múmkindik beredi.
Prezıdent Qurama Shtattarynyń eki jynysty – erkek pen áıeldi – onyń ishinde tólqujat pen vıza sııaqty barlyq memlekettik qujattarda taný saıasatyn bekitti.
Tramp resmı túrde Memlekettik basqarýdyń tıimdilik departamentin (DOGE) resmı túrde qurý týraly buıryqqa qol qoıdy, oǵan memlekettik shyǵyndardy qysqartý mindeti júkteledi.
Energetıka salasynda «Energetıkadaǵy ulttyq tótenshe jaǵdaı týraly» qujatqa qol qoıyldy, bul bıýrokratııany qysqartý jáne kóbirek burǵylaýǵa múmkindik berý úshin qajet qujat. Qol qoıylǵan ekinshi qujat Alıaskada kóbirek energııa óndirýge múmkindik beredi.
Ol sonymen qatar Alıaskadaǵy eń bıik taý «Denalı» ataýyn «Mak-Kınlıge» ózgertý týraly jarlyqqa qol qoıdy. Prezıdent Barak Obama taýdyń atyn 2015 jyly Alıaskadaǵy jergilikti taıpalar men saıasatkerlerdiń ótinishi boıynsha ózgertti, bul 25-shi prezıdent Ýılıam Mak-Kınlıdiń týǵan jeri Ogaıo shtatynda narazylyq týdyrdy.
Tramp Meksıka shyǵanaǵynyń ataýyn da Amerıka shyǵanaǵy dep ózgertti, biraq AQSh prezıdentiniń halyqaralyq sýlar dep sanalatyn aýmaqtyń atyn ózgertýge quqy bar-joǵy belgisiz.
«Prezıdenttiń Atqarýshy keńsesinde jumys isteý úshin jumysqa qabyldanǵan tulǵalardyń qaýipsizdik ruqsattaryn óńdeýdegi» «kidiriske» silteme jasaı otyryp, Tramp Aq úıge óte qupııa aqparat alýǵa ruqsat alatyn qyzmetkerlerdiń tizimin daıyndaýdy tapsyrdy.
Eske sala keteıik, Donald Trampty ulyqtaý rásimi boldy.
Donald Tramp Vashıngtonda ótip jatqan ulyqtaý rásiminde sóz sóılep, Amerıkanyń altyn ǵasyry bastalǵanyn málimdedi.