Tramp Ilon Maskqa keshirim berýge daıyn ekenin málimdedi
ASTANA. KAZINFORM — AQSh prezıdenti Donald Tramp 3 qarashada ótetin aralyq saılaýdan keıin Demokratııalyq partııa Kongresti baqylaýyna alsa, Ilon Mask pen onyń jaqyn kómekshilerine aldyn ala keshirim berýge daıyn ekenin málimdedi.
TASS agenttiginiń málimetinshe, New York Post gazetiniń Pod Force One podkastynda Tramp jýrnalıst Mıranda Dıvaınnyń demokratııalyq partııa ókilderi Ilon Masktyń SpaceX kompanııasyn memleket menshigine alýǵa áreket jasaýy múmkin degen boljamyn joqqa shyǵardy. Alaıda qajet bolǵan jaǵdaıda kásipker men onyń jaqyn kómekshilerin qorǵaýǵa daıyn ekenin aıtty.
— Biz bul adamdardy qorǵaýymyz kerek, — dedi Tramp.
AQSh basshysynan muny qalaı júzege asyrmaq ekenin jáne aldyn ala keshirim berý quqyǵyn paıdalanatynyn suraǵanda, ol bul qadamǵa barýǵa daıyn ekenin rastady.
— Árıne, qajet bolsa, solaı isteımin, — dep jaýap berdi ol.
AQSh-tyń qazirgi prezıdenti ózine áli eshqandaı aıyp taǵylmaǵan adamdarǵa da aldyn ala keshirim bere alady. Mundaı sheshim federaldyq bılik organdarynyń olardy qylmystyq jaýapkershilikke tartýyn aıtarlyqtaı qıyndatady nemese múlde múmkin emes etedi.
AQSh-ta aralyq saılaý 3 qarashada ótedi. Saılaý barysynda Senattyń úshten biri men Ókilder palatasynyń barlyq múshesi, sondaı-aq 36 shtat pen aýmaqtyń gýbernatorlary qaıta saılanady. Qazirgi ýaqytta Kongrestiń qos palatasynda da respýblıkashyldar basymdyqqa ıe.
Eske salaıyq, Donald Tramp pen Ilon Mask arasyndaǵy kelispeýshilik 2025 jylǵy maýsymda AQSh ákimshiliginiń salyq jáne memlekettik shyǵyndarǵa qatysty negizgi zań jobasy tóńireginde týyndaǵan edi.
Bıyl 6 qazanda Ilon Masktyń Donald Tramp ákimshiligimen qaıtadan yntymaqtasa bastaǵany belgili boldy. Ol Pentagonnyń «Merıdıan» atty jańa jobasyna Palmer Lakı jáne Nıýt Gıngrıchpen birge teń tóraǵa bolyp taǵaıyndaldy.
Al 16 qazanda Mask Senattaǵy saılaýda respýblıkashyldardyń jeńisine qoldaý kórsetý úshin 158 mıllıon dollar kóleminde qarajat bólgeni habarlandy.
