Tramp Ibrahım kelisimin keńeıtýdi usyndy

— Iranmen mámilege kelýge tyrysyp jatyrmyz. Eger bul sheshim eki tarapqa da tıimdi bolmasa, shabýyldy jalǵastyramyz. Bul joly soqqy burynǵydan da kúshtirek bolýy múmkin. Qaqtyǵysty eshkim jalǵastyrǵysy kelmeıdi, — dep jazdy ol Truth Social áleýmettik jelisinde.

Tramp Saýd Arabııasy, Birikken Arab Ámirlikteri, Qatar, Pákistan, Túrkııa, Mysyr, Iordanııa jáne Bahreın basshylarymen kelissóz júrgizgenin aıtty. Onyń sózinshe, atalǵan memleketter Ibrahım kelisimine bir ýaqytta qosylýy múmkin.

Aq úı basshysynyń málimdeýinshe, Ibrahım kelisimine qosylǵan elderdiń qatarynda Qazaqstan da bar.

Tramp bul kelisimge qatysýshy memleketter ekonomıkalyq jáne áleýmettik turǵydan paıda kórip otyrǵanyn atap ótti. Onyń aıtýynsha, álemdegi qaqtyǵystar men turaqsyzdyqqa qaramastan, atalǵan elderdiń eshqaısysy sharttan bas tartýǵa nıet bildirmegen.

— Ibrahım kelisimi Taıaý Shyǵystaǵy turaqtylyqqa jol asha alady. Bul bastama ózge memleketter úshin de oń ózgeris ákeledi, — dedi Tramp.

AQSh prezıdentiniń aıtýynsha, kelisimge Saýd Arabııasy men Qatardyń qosylýy mańyzdy qadam bolmaq. Ol basqa memleketter de osy elderdiń tájirıbesine súıenip sheshim qabyldaıdy dep esepteıdi.

— Barlyq eldiń Ibrahım kelisimine qosylǵanyn qalaımyn. Eger Iran bul bastamany qoldasa, buryn-sońdy bolmaǵan halyqaralyq koalıtsııanyń bir bóligine aınala alady, — dedi Tramp.

Onyń pikirinshe, bul kelisim Taıaý Shyǵysty biriktirip, álemdegi eń yqpaldy ári ekonomıkalyq áleýeti joǵary odaqtardyń birin qalyptastyrýy múmkin.

Buǵan deıin Memleket basshysy Ibrahım kelisimine qosylý sheshiminiń durystyǵyna senimdi ekenin aıtty. 

Sondaı-aq Qasym-Jomart Toqaev Qazaqstannyń Ibrahım kelisimine ne úshin qosylǵanyn túsindirdi.

Ibrahım kelisimi týraly tolyǵyraq myna siltemeden oqı alasyz.

Darııa Ǵumar