Tramp Hanter men Eshlı Baıdendi kúzetten aıyrdy

ASTANA. KAZINFORM – AQSh prezıdenti Donald Tramp Qupııa qyzmet budan bylaı burynǵy prezıdent Djo Baıdenniń balalary – uly Hanter men qyzy Eshlıdi qorǵamaıtynyn málimdedi.

- Hanter Baıden uzaq ýaqyt boıy Qupııa qyzmettiń qorǵaýynda boldy, onyń barlyǵyn AQSh salyq tóleýshileri tóledi. Bul iske 18 adam jumyldyrylǵan, bul kúlkili! Búginnen bastap Hanter Baıden Qupııa qyzmetiniń qorǵaýynda bolmaıtynyn eskerip júrińiz. Sol sııaqty 13 agenti bar Eshlı Baıden de tizimnen shyǵarylady, - dep jazdy Donald Tramp Truth Social-da. 

AQSh prezıdenti Hanter Baıdenniń Ońtústik Afrıkada júrýine de kóńili tolmaıtynyn bildirdi.

- Ol qazir adam quqyqtary kúrdeli máselege aınalǵan Ońtústik Afrıkada demalyp júr. Osyǵan baılanysty Ońtústik Afrıka ekonomıkalyq jáne qarjylyq kómek alatyn elderimizdiń tiziminen shyǵaryldy, - dep atap ótti Donald Tramp.

Buǵan deıin AQSh Ońtústik Afrıkaǵa kómek kórsetýdi toqtatqanyn jazǵan bolatynbyz.