Tramp HAMAS-ty qarýsyzdandyrý boıynsha kelisim týraly jarııalady
ASTANA. KAZINFORM – AQSh prezıdenti Donald Tramp Gaza sektoryndaǵy palestınalyq HAMAS qozǵalysy men basqa da qarýly toptardy tolyq qarýsyzdandyrý týraly «tarıhı kelisimge» qol jetkizilgenin jarııalady, dep habarlaıdy Euronews.
Donald Tramptyń aıtýynsha, bul kelisim onyń Gaza sektoryndaǵy soǵysty toqtatý josparyn júzege asyrýdaǵy mańyzdy qadam boldy.
- Kelisim – Gazany Palestına halqyna kómektesý úshin Beıbitshilik keńesimen tyǵyz jumys isteıtin jańa Palestına úkimetiniń baqylaýyna berý jolyndaǵy mańyzdy qadam. Sonymen qatar Izraıl laıyqty qaýipsizdikti alady, óıtkeni Gaza endi lańkestik shabýyldar úshin baza retinde paıdalanylmaıdy, - dep jazdy amerıkalyq kóshbasshy H áleýmettik jelisinde.
Ol bul kelisimniń Gazadaǵy soǵysty toqtatý boıynsha 20 tarmaqtan turatyn josparyn júzege asyrýdaǵy mańyzdy qadam ekenin naqtylady. Tramp sonymen qatar qarýsyzdaný protsesi aıaqtalǵannan keıin Izraıl qorǵanys kúshteriniń bólimsheleri Gaza sektorynan ketetinin málimdedi.
Onyń aıtýynsha, kelisim aýyr qarý-jaraqty qosa alǵanda qarý-jaraqty kezeń-kezeńimen berýdi, qoımalar men týnnelderdi bólshekteýdi kózdeıdi jáne bul protsess halyqaralyq baqylaýmen júrgizilýi tıis.
Osy arada HAMAS ta, Izraıl bıligi de kórsetilgen sharttarmen keliskenin málimdegen joq.
Izraıl men HAMAS arasyndaǵy kelissóz buryn Palestına qozǵalysyn qarýsyzdandyrý, Izraıl áskerlerin Gaza sektorynan shyǵarý jáne Palestına aýmaǵynyń bolashaǵy týraly kelispeýshilikterge baılanysty birneshe ret toqtap qalǵan.
Eske salsaq, Palestınanyń HAMAS qozǵalysy AQSh qoldaǵan soǵystan keıingi retteý jospary aıasynda Gaza sektoryndaǵy úkimetin taratqanyn jarııalady.
The Times of Israel jáne Reuters basylymdarynyń habarlaýynsha, HAMAS úkimetiniń taratylýy eń aldymen sımvolıkalyq sıpatqa ıe jáne qozǵalystyń Gaza sektoryn azamattyq basqarýdy Ulttyq komıtetke tapsyrýǵa daıyn ekenin kórsetýge baǵyttalǵan.
Alaıda bul protsess taraptar arasyndaǵy HAMAS-tyń qarýsyzdanýy men atysty toqtatýdy júzege asyrýǵa qatysty kelispeýshilikterge baılanysty toqtap qaldy.
