Tramp HAMAS-tan kepildegi adamdardy dereý bosatýdy talap etti
ASTANA. KAZINFORM – AQSh prezıdenti Donald Tramp HAMAS radıkaldy palestınalyq qozǵalysynan kepildegi barlyq adamdardy bosatýdy talap etti, dep jazady reseılik TASS.
- HAMAS-qa aıtyńyzdar, kepildegi barlyq 20 adamdy dereý bosatsyn, sonda bári tez ózgeredi. Osynyń bári toqtaıdy! - dep jazdy AQSh prezıdenti Truth Social áleýmettik jelidegi paraqshasynda.
Alaıda ol kepildegi adamdar bosatylsa qandaı ózgerister bolatynyn naqtylamady. Shamasy ol Gaza sektoryndaǵy atysty toqtatý týraly aıtqan bolýy kerek.
Aıta keteıik, 2023 jyldyń 7 qazanynda HAMAS jaqtastarynyń Gaza sektorynan Izraıl aýmaǵyna kirgeninen soń Taıaý Shyǵystaǵy jaǵdaı kúrt shıelenisti. Óıtkeni ol kezde HAMAS jaqtastary Gaza men Izraıldiń shekaralas aýmaǵyndaǵy eldi meken turǵyndaryn óltirip, 250-den astam adamdy kepilge alǵan bolatyn.
Buǵan jaýap retinde Izraıl HAMAS-tyń áskerı jáne saıası qurylymdaryn joıý jáne urlanǵan adamdardy qaıtarý úshin anklavta áskerı operatsııa bastady.
Gazanyń Densaýlyq saqtaý mınıstrliginiń málimetterinshe, áskerı áreketterdiń saldarynan 63 myńnan astam palestınalyq mert boldy, 161 myńnan astam adam jaraqat aldy. Sonymen qatar 367 jergilikti turǵyn, sonyń ishinde 131 sábı ashtyqtan óldi.
Osyǵan deıin Gaza sektorynda úshinshi jyl qatarynan 660 myń bala mektepke bara almaı júrgeni týraly jazdyq.