Tramp HAMAS-qa Gazadaǵy beıbitshilik josparyna jaýap berý úshin birneshe kún berdi

ASTANA.KAZINFORM - AQSh prezıdenti Donald Tramp HAMAS-tan aldaǵy birneshe kún ishinde onyń beıbitshilik josparyna jaýap berýin talap etti, dep habarlaıdy Kazinform agenttiginiń menshikti tilshisi.

30 qyrkúıek kúni Tramp Vashıngtonda palestınalyq top 20 tarmaqtan turatyn kelisimdi «úsh-tórt kún ishinde» qabyldaýy kerek ekenin málimdedi.

Ol bul jospardy Izraıl men arab elderi qoldap otyrǵanyn, endigisi HAMAS-qa baılanysty ekenin aıtty. AQSh prezıdenti bas tartýdyń sońy qaıǵyly aıaqtalatynyn eskertti.

Jospar tez arada atysty toqtatýdy, palestınalyq tutqyndardy kepilge aıyrbastaýdy, Izraıl áskerin Gaza sektorynan kezeń-kezeńmen shyǵarýdy jáne HAMAS-ty qarýsyzdandyrýdy kózdeıdi.

Qujatta sondaı-aq halyqaralyq turaqtandyrý kúshterin ornalastyrý jáne palestınalyq tehnokrattardyń ýaqytsha úkimetin qurý týraly aıtylǵan. Izraıl premer-mınıstri Bınıamın Netanıahý bul bastamany ashyq qoldady, biraq keıinirek Palestına memlekettiliginiń bolashaǵyna kúmán keltirdi.

Reuters aqparat kózderiniń habarlaýynsha, HAMAS bul jobanyń júzege asyrylmaıtynyn jáne onyń tolyǵymen Izraılge baǵyttalǵanyn aıtty. Alaıda, qozǵalys deldaldardyń qysymyna ushyrady: Qatar men Mysyr bul jospardy Dohada tanystyrdy, al Túrkııa eki jylda alǵash ret kelissózderge qosyldy. Qatar Syrtqy ister mınıstrliginiń habarlaýynsha, top qujatqa jaýapkershilikpen qaraýǵa ýáde bergen.

Netanıahý da ishki qysymǵa tap boldy. Izraıl qoǵamy soǵystyń tez aıaqtalýyn talap etip, ásire ońshyl mınıstrler premer-mınıstr tym kóp jeńildikter jasasa, koalıtsııany ydyratamyz dep qorqytty. Iordan ózeniniń batys jaǵalaýyndaǵy basym kúsh Palestınanyń FATH qozǵalysy AQSh-tyń soǵysty toqtatý áreketin quptap, aıaqtalǵannan keıin saılaýǵa daıyn ekenin bildirdi. Alaıda uıymnyń joǵary laýazymdy qyzmetkeri Abbas Zakı bul jobany basqynshylyqty zańdastyryp, Palestınanyń birligin buzatyn qujat dep sıpattady.

VVS agenttiginiń habarlaýynsha, HAMAS-tyń joǵary laýazymdy sheneýnigi qozǵalystyń Tramp usynysynan bas tartýy múmkin ekenin aıtqan. Sebebi ol Izraıl múddesine qyzmet etedi jáne Palestına halqynyń talabyna pysqyryp ta qaramaıdy.

Basylymnyń habarlaýynsha, toptyń Gazadaǵy áskerı qolbasshysy Izz ad-Dın ál-Haddad qarýly kúresti jalǵastyrýdy tabandy túrde jaqtaıdy, al anklavtan tys joǵary basshylyq shette qalyp otyr. Al, «Islamdyq jıhad» qozǵalysy bul jospardy palestınalyqtardyń kelisiminsiz tańylǵan dep atap, resmı túrde bas tartty.

Kelissózder kezinde Izraıl kúshteri beıbit turǵyndardyń qalanyń ortalyq aýdanynan ketýin talap etetin jańa paraqshalar taratyp, ortalyq Gaza qalasyna shabýylyn jalǵastyrdy.

Osyǵan deıin Túrkııany qosa alǵanda segiz memleket Tramptyń Gazadaǵy shabýyldy toqtatý josparyn qoldaǵany týraly jazdyq.