Tramp Gýantanamoda deportatsııalanǵan ımmıgranttarǵa lager salýǵa buıryq berdi

ASTANA.KAZINFORM - AQSh prezıdenti Donald Tramp sársenbi kúni zańsyz ımmıgratsııamen kúresý týraly buıryq shyǵarýdy jalǵastyrdy, dep jazady VVS.

Ol Kýbanyń Gýantanamosynda ımmıgranttar úshin 30 myń adamǵa arnalǵan lager salý týraly buıryqqa qol qoıdy.

Tramp bul lagerge «Amerıka halqyna qaýip tóndiretin zańsyz sheteldikter arasyndaǵy eń qaýipti qylmyskerler» jiberiletinin aıtty.

Gýantanamodaǵy AQSh bazasy sońǵy eki onjyldyqta amerıkalyqtar jıhadshy-tutqyndardy ustaıtyn áskerı túrme retinde tanymal boldy, biraq BBC-diń Ortalyq Amerıkadaǵy tilshisi Ýıll Grant atap ótkendeı, baza sonymen qatar ondaǵan jyldar boıy áskerı bazadan bólek mıgratsııalyq ortalyq qyzmetin atqardy.

Tramp ákimshiliginiń shekara jáne ımmıgratsııa jónindegi joǵary laýazymdy qyzmetkeri Tom Homan jýrnalısterge dál osy ortalyq 30 000 tósekke deıin keńeıtiletinin aıtty. Homan ondaǵy qamaý sharttary eń joǵary standarttarǵa saı bolady dep sendirdi.

Ýıll Grant osy ýaqytqa deıin ortalyqta negizinen AQSh-qa teńiz arqyly zańsyz kirmek bolǵandar ornalasqanyn atap ótti.

Bul áskerı túrmede 2002 jyly qurylǵannan beri Irak pen Aýǵanstandaǵy jáne basqa jerlerdegi áskerı joryqtar kezinde amerıkalyqtardyń qolyna túsken 800-ge jýyq tutqyn bolǵan.

Amerıka baspasóziniń habarlaýynsha, qazir ol jerde bar bolǵany 15 tutqyn bar.

Aıta keteıik, Donald Tramp bıliktegi úshinshi kúninde AQSh-tyń ońtústik shekarasyn zańsyz ımmıgranttar úshin jabýǵa jáne olardy deportatsııalaýdy arttyrýǵa baǵyttalǵan buıryqtarǵa qol qoıǵan bolatyn.

26 qańtarda 956 adam qamaýǵa alyndy.

27 qańtarda AQSh-tyń ımmıgratsııa jáne kedendik baqylaý polıtsııasy 1179 adamdy ustady.

Aıta keteıik, Tramp mıgranttardy qabyldaýdan bas tartqan Kolýmbııaǵa sanktsııa saldy.