Tramp Grenlandııany satyp alǵysy keledi — Marko Rýbıo

ASTANA. KAZINFORM — AQSh Memlekettik hatshysy Marko Rýbıo zań shyǵarýshylarǵa prezıdent Donald Tramptyń Grenlandııany basyp alýdy emes, satyp alýdy josparlap otyrǵanyn habarlady, dep jazdy The New York Times. 

Rýbıo bul málimdemeni Kongrestiń eki palatasyndaǵy Qarýly kúshter jáne Syrtqy saıasat jónindegi negizgi komıtetteriniń zań shyǵarýshylary qatysqan brıfıngte jasady. 

Kapıtolııdegi brıfıng Venesýelaǵa arnalǵan, biraq zań shyǵarýshylar Amerıka prezıdentiniń agressıvti málimdemelerin eskere otyryp, Tramptyń Grenlandııaǵa qatysty nıetine alańdaýshylyq bildirdi.

Rýbıo Grenlandııany satyp alý týraly aıtqanda neni meńzep turǵanyn túsindirgen joq. 

Seısenbi kúni alty NATO eliniń kóshbasshylary Danııa premer-mınıstri Mette Frederıksenmen birge Tramptyń Qurama Shtattar Grenlandııany basyp alýy kerek degen málimdemelerin joqqa shyǵaratyn birlesken málimdeme jasady. Danııaǵa Ulybrıtanııa, Frantsııa, Germanııa, Italııa, Ispanııa jáne Polsha qosyldy — olardyń barlyǵy AQSh odaqtastary.

— Arktıkadaǵy qaýipsizdik NATO odaqtastarymen, sonyń ishinde Qurama Shtattarmen birlesip, egemendik, aýmaqtyq tutastyq jáne shekaralardyń qol suǵylmaıtyndyǵy sııaqty BUU Jarǵysynyń qaǵıdattaryn saqtaý arqyly qamtamasyz etilýi tıis. Bul ámbebap qaǵıdattar jáne biz olardy qorǵaýdy toqtatpaımyz, — delingen birlesken málimdemede.

Buǵan deıin Aq úı Grenlandııany satyp alý «ulttyq qaýipsizdik basymdyǵy» ekenin jáne bul maqsatqa jetý úshin AQSh áskerı kúshterin paıdalaný qarastyrylyp jatqanyn málimdedi.