Tramp Google-di qorǵap, Eýroodaqqa jaýapty sharalar qoldanatynyn málimdedi
ASTANA. KAZINFORM – AQSh prezıdenti Donald Tramp Google kompanııasyna salynǵan 2,95 mlrd eýro kólemindegi aıyppulǵa baılanysty Eýroodaqqa jaýapty sharalar qoldanatynyn aıtty, dep habarlaıdy Euronews.
Truth Social áleýmettik jelisindegi paraqshasynda Tramp bul sheshimdi «óte ádiletsiz» dep atap, óz ákimshiliginiń «bul dıskrımınatsııalyq áreketterdiń kúshinde qalýyna jol bermeıtinin» jazdy.
Ol sondaı-aq AQSh-ta salyq tóleıtin amerıkalyq kompanııalarǵa salynǵan ádiletsiz aıyppuldardy joıý úshin Saýda týraly 1974 jylǵy zańnyń 301-babyna sáıkes tergeý bastaıtynyn málimdedi.
Atalǵan zańǵa sáıkes, AQSh basqa memleketterdiń áreketterin «negizsiz» nemese «ádiletsiz» dep tapqan jaǵdaıda, olarǵa qarsy qosymsha tarıfter engize alady.
– Men Eýropalyq odaqpen bul másele boıynsha sóılesetin bolamyn, – dedi Tramp juma kúni Aq úıde jýrnalısterge.
Eýropalyq komıssııanyń habarlaýynsha, tergeý barysynda Google kompanııasynyń onlaın-jarnama naryǵynda óz qyzmetterin artyqshylyqpen paıdalanyp, básekelesterine, jarnama berýshiler men onlaın-baspagerlerge zııan keltirgeni anyqtalǵan.
Zertteý Google-dyń AdX bırjasy men DFP jarnama platformasyna qatysty boldy. Bul quraldar jarnama berýshiler men óz saıttarynda jarnama ornyn satqysy keletin baspagerlerdi baılanystyratyn júıe bolyp tabylady.
Bul – 2017 jyldan beri Eýroodaqtyń Google-ǵa tórtinshi ret iri aıyppul salýy. Buǵan deıin de Brıýssel kompanııaǵa mıllıardtaǵan eýro kóleminde sanktsııalar qoldanǵan bolatyn.
