Tramp Gaza sektory boıynsha beıbit kelisimniń ekinshi kezeńi bastalǵanyn málimdedi

ASTANA. KAZINFORM – AQSh prezıdenti Donald Tramp Gaza sektoryndaǵy jaǵdaıdy retteý boıynsha beıbit jospardyń ekinshi kezeńiniń bastalǵanyn málimdedi, dep habarlaıdy TASS.

Tramp kepildegi 20 adamnyń barlyǵy qaıtarylǵanyn, alaıda mert bolǵandardyń deneleri áli Gazada ekenin jetkizdi.

-Ekinshi kezeń qazir bastalady,-dep jazdy ol Truth Social áleýmettik jelisindegi paraqshasynda.

Reuters agenttiginiń habarlaýynsha, palestınalyq HAMAS qozǵalysy deldaldarǵa Izraıldiń kepilde bolǵan tórt azamatynyń denesin seısenbi kúni keshkisin beretinin habarlaǵan.

Osyǵan deıin HAMAS kepildegi 20 tiri azamatty jáne tórt máıitti qaıtardy. Alaıda áli kepilde bolǵan 24 adamnyń denesi qaıtarylmaǵan.

Aıta keteıik, keshe Sharm-esh-Sheıh qalasynda Gaza sektoryndaǵy atysty toqtatý jáne kepildegi barlyq Izraıl azamattaryn bosatý máselesine arnalǵan «Beıbitshilik sammıti» ótti.

Otyrystyń qorytyndysy boıynsha Mysyr prezıdenti Abdel Fattah as-Sısı, Qatar Ámiri sheıh Tamım ben Hamad Ál Tanı, AQSh prezıdenti Donald Tramp jáne Túrkııa prezıdenti Rejep Taıyp Erdoǵan Gaza sektorynda atysty toqtatý jónindegi túpkilikti kelisimge qol qoıdy.

Sammıt qatysýshylary qaqtyǵysty retteý boıynsha Tramp usynǵan jospardyń kelesi kezeńderin júzege asyrýǵa shaqyrdy.

BUU ókilderi de qaqtyǵys taraptaryn atysty toqtatý rejımi boıynsha belgilengen sharttardy qatań saqtaýǵa úndedi.