Tramp Garvardqa bólgen 1 mlrd dollar qarjyny keri qaıtarmaq

ASTANA. KAZINFORM – AQSh prezıdenti Donald Tramp Garvard ýnıversıtetimen ashyq kúresi aıasynda bul mekemege qosymsha federaldyq qarjylandyrý túrinde bólingen 1 mlrd dollardy keri qaıtarýdy josparlap otyr, dep habarlaıdy FOX News.  

Aq úı Salyq qyzmetinen Garvardtyń kampýstaǵy antısemıtızmmen kúresýde sátsizdigine baılanysty ony ýnıversıtet mártebesinen aıyrýdy surady.

Naýryzda Ádilet mınıstrligi federaldy kelisimsharttar men úkimet qarjylandyratyn granttarǵa «keshendi sholýdy» bastady. Ótken aptada Іshki qaýipsizdik mınıstrligi ýnıversıtet úshin bólingen 2,7 mln dollar kólemindegi grantty keri qaıtardy.

Truth social áleýmettik jelisindegi jazbasynda Tramp Garvard «jolynan adasqanyn» jáne federaldy qarjylandyrýǵa laıyq emes ekenin jazdy.

- Garvard stýdentterge jáne «bolashaq kóshbasshylar» dep atalatyndarǵa tek qana «sátsizdikti» úırete alatyn, áli jetilmegen, radıkaldy solshyldardy, aqymaqtardy jáne «bos bastardy» qabyldap otyr. Garvardty endi tipti oqýǵa laıyqty oryn dep sanaýǵa bolmaıdy jáne ony álemdegi eń úlken ýnıversıtetter men kolledjderdiń eshbir tizimine qospaý kerek. Garvard – bul SAIQYMAZAQ, ol óshpendilik pen aqymaqtyqqa úıretedi jáne ol endi federaldyq qarajat almaýy kerek, - dep jazdy Donald Tramp.

Ýnıversıtettiń federaldyq úkimetke qarsylyǵyn qoldaıtyn Garvard ýnıversıtetiniń memlekettik basqarý professory Raıan Enos basqa kózqaras bildirdi.

- Úkimet jeke mekemege onyń ishki isterinde neni jasaý kerektigin aıta almaıdy. Halyq qalaǵan nársesine narazylyq bildirýge quqyly. Meniń oıymsha, biz bul eki nárseni aralastyrmaý úshin óte saq bolýymyz kerek, áıtpese sóz bostandyǵyn buzý sııaqty nárse jasaý qaýpi bar, - dedi Raıan Enos.

Buǵan deıin AQSh Garvard-qa bólinetin 2,2 mlrd dollar memlekettik qarjylandyrýdy toqtatatynyn jazǵan bolatynbyz.

Sonymen qatar Tramp ákimshiligi Garvardtan sheteldik stýdentterdi qabyldaý quqyǵyn alyp qoımaq.