Tramp Garvard ýnıversıtetiniń aýzynan jyrǵan qarjyny kásiptik mektepterge bermekshi

ASTANA. KAZINFORM — AQSh Prezıdenti Donald Tramp dúısenbi kúni Garvard ýnıversıtetimen qaqtyǵysta jeńiske jetýge ýáde berip, álemdegi eń bedeldi oqý oryndarynyń birinen mıllıardtaǵan dollar kólemindegi qarjyny alyp qoıatynyn alǵa tartyp, taǵy da qorqytty. Bul týraly NDTV saıty Tramptyń málimdesine silteme jasap, jazdy.

— Men óte antısemıttik Garvardtan úsh mıllıard dollar kólemindegi grantty alyp, ony elimizdegi kásiptik mektepterge berýdi qarastyryp jatyrmyn, — dedi Tramp dúısenbi kúni, AQSh-taǵy Eske alý kúninde, óziniń Truth Social platformasynda jarııalaǵan jazbasynda. 

Ol sondaı-aq Garvardtan sheteldik stýdentterdi shyǵarý máselesin kóterdi — bul AQSh-taǵy eń kóne ýnıversıtet úshin negizgi tirek bolyp sanalady, óıtkeni sheteldik stýdentterden alynatyn oqý aqysy ýnıversıtettiń mańyzdy kiris kózi. Tramp Garvardtan osy stýdentterdiń tizimin usynýdy talap etip otyr.

Tramp bul tizimdi «mıllıardtaǵan dollardyń bosqa jumsalǵanyn anyqtaý úshin» qajet dep sanaıdy jáne «radıkaldanǵan essizder men búlikshilerdiń» elge qaıta oralýyna jol bermeý úshin qajet ekenin aıtty.

Ol sózin: «Qoryqpańyzdar, úkimet sońynda jeńiske jetedi!» — dep túıindedi.

Buǵan deıin habarlanǵandaı, Garvardtyń Trampqa qarsy tartysynda sot sheteldik stýdentterdiń múddesin qorǵaıtyn ýnıversıtetti qoldaǵan bolatyn.