Tramp Fox News-ke bergen suhbatynda Zelenskııdiń «jaqsylyqty bilmeıtinin» aıtty
ASTANA. KAZINFORM — AQSh prezıdenti Donald Tramp Fox News-ke bergen suhbatynda Ýkraına basshysy Vladımır Zelenskıı «istegen jaqsylyqty baǵalamaıtynyn» qaıtalady, dep habarlaıdy Fox News.
— Ol aqyldy ári qatygez jigit. Baıdenniń tusynda bul elden aqshany sábıden kámpıt alǵandaı aldy, — dedi Donald Tramp Zelenskıı týraly.
Tramp AQSh-tyń Ýkraınaǵa 350 mlrd dollar, bul rette Eýropanyń 100 mlrd dollar bergenin atap ótti.
AQSh prezıdenti Zelenskııdiń sırek jer elementteri boıynsha AQSh-pen kelisim jasaıtynyna úmittenetinin atap ótti.
«Sunday Morning Futures» baǵdarlamasynyń júrgizýshisi Marııa Bartıromo AQSh prezıdentinen onyń Reseıge saıası qysymdy azaıtty dep málimdegen synshylar týraly surady.
— Reseıge qataldyq tanytqandar arasynda Donald Tramptan asqan adam joq. Esińizde bolsa, «Soltústik aǵyn-2» qubyryn toqtatqan men edim, — dedi AQSh prezıdenti.
«Ýkraınanyń aman qalmaýy múmkin be?» degen suraqqa Tramp: «Ol kez kelgen jaǵdaıda aman qalmaýy múmkin» dep jaýap berdi.
Júrgizýshi prezıdent janjalda Reseı tarapyn tańdady deıtin synaýshylarǵa ne aıtaryn surady. Tramp bul suraqqa tikeleı jaýap berýden bas tartyp, onyń ornyna «Reseıge Donald Tramptan asqan eshkim qatal bolǵan emes. Eshkim. Jáne olar muny biledi» degen sózderin qaıtalady.
Sonymen birge Tramp Reseıge salynǵan sanktsııalarǵa qaramastan Pýtınmen, Kım Chen Ynmen jáne Tóraǵa Sı Tszınpınmen jaqsy qatynasta ekenin atap ótti.
Tramp pen Zelenskıı ne týraly sóıleskenin myna materıaldan oqı alasyz.