Tramp Florıdany iri apat aımaǵy dep jarııalady
ASTANA. QazAqparat - AQSh prezıdenti Donald Tramp Florıda shtatynyń gýbernatory Rık Skottyń atalǵan shtattyń aımaǵyn iri tabıǵı apat aımaǵy dep jarııalaý jónindegi usynysyn bekitti, dep habarlaıdy TASS.
Atalmysh sheshim federaldyq qarjyny «Irma» daýylynan zardap shekkenderge eshqandaı kedergisiz jumsaýǵa múmkindik beredi. Sondaı-aq memlekettik qyzmetkerlerdiń belgilengen mólsherden tys jumysyna ótemaqy tóleýge múmkindik beredi, dep túsindirdi gýbernator.
Ol memleket basshysynyń jiberilgen ótinishti azdaǵan ýaqyttyń ishinde-aq bekitkendigin jetkizdi.
«Irma» daýyly tónip turǵanda Florıdany el halqy túgel qoldaıtyny túsinikti. Men sondaı-aq álemniń túkpir-túkpirindegi halyqtardyń Florıdaǵa qoldaý kórsetkisi keletinin bilemin. Bul árıne, adamnyń rızashylyǵyn týdyrady. Sol sebepti men Florıda turǵyndarynyń atynan bizge kórsetilip otyrǵan qoldaýdy, yntymaqtastyqty joǵary baǵalaıtynymyzdy aıtyp ótkim keledi»,-dedi gýbernator.
