Tramp FIFA-nyń alǵashqy Beıbitshilik syılyǵyn ıelendi
ASTANA. KAZINFORM – 2026 jylǵy fýtboldan álem chempıonatynyń jerebe tartý rásimi aldynda AQSh prezıdenti Donald Trampqa álemdegi beıbitshilikti nyǵaıtýǵa qosqan úlesi úshin FIFA-nyń alǵashqy Beıbitshilik syılyǵy tabystaldy, dep habarlaıdy Anadolu.
Vashıngtondaǵy Kennedı ortalyǵynda ótken jerebe aldynda AQSh prezıdentine fýtbol tarıhynda alǵash ret taǵaıyndalǵan bul marapat saltanatty túrde berildi.
FIFA prezıdenti Djannı Infantıno Trampqa syılyqty tapsyra otyryp, onyń bir jyl ishinde álemniń túrli aımaqtaryndaǵy birqatar qarýly qaqtyǵystardy toqtatýda mańyzdy ról atqarǵanyn atap ótti.
Infantınonyń aıtýynsha, FIFA alǵash ret taǵaıyndaǵan Beıbitshilik syılyǵy Tramptyń jahandyq turaqtylyqty qamtamasyz etýge qosqan úlesine berilip otyr.
Marapatty alǵannan keıin Donald Tramp sóz sóılep, Kongo Demokratııalyq Respýblıkasy men Rýanda arasyndaǵy qaqtyǵys, Úndistan men Pákistan arasyndaǵy shıelenister sekildi túrli aımaqtardaǵy mysaldardy keltirip: «Biz mıllıondaǵan adamnyń ómirin saqtap qaldyq. Bul marapat – men úshin úlken qurmet», – dedi.
Ol sondaı-aq osy úderistegi qoldaýy úshin otbasyna, sondaı-aq 2026 jylǵy álem chempıonaty aıasyndaǵy seriktestigi úshin Kanada men Meksıka basshylaryna alǵys bildirdi.
«Álem burynǵydan da qaýipsiz bola tústi», – dep atap ótti.
Eske salaıyq, buǵan deıin Vashıngtonda 2026 jylǵy fýtboldan álem chempıonatynyń jerebe tartý rásimi ótken bolatyn.