Tramp feık jańalyqtarmen kúreste 36 mln dollar ótemaqy óndirdi

ASTANA. KAZINFORM – AQSh prezıdenti Donald Tramp feık jańalyqtar taratatyn BAQ-qa qarsy kúreste iri jeńiske jetkenin málimdedi, dep habarlaıdy Kazinform tilshisi.

Tramp TruthSocial paraqshasynda CBS, Paramount jáne «60 mınýt» baǵdarlamasyna qarsy sot isinde 16 mln dollar ótemaqy óndirilgenin, al bolashaqta jalpy somasy 36 mln dollarǵa jetýi múmkin ekenin aıtty. Ol muny «aqparattyq alaıaqtyqpen kúrestegi mańyzdy jeńis» dep atady.

Prezıdent sondaı-aq CNN, The Washington Post, The New York Times, MSNBC sekildi jetekshi medıalarǵa eskertý jasap, olardy «jalǵan aqparat taratqany úshin jaýapqa tartamyz» dedi.

Sonymen qatar ol telejúrgizýshiler Djımmı Kımmel men Djımmı Fellondy synǵa aldy, olardy «talantsyz jáne telearnalardy qurtqan tulǵalar» dep atap, efırden ketýin «qýanyshty jańalyq» dep baǵalady.

Tramp sondaı-aq:

• «Amerıka daýysy» agenttiginiń 600-ge jýyq qyzmetkerin jumystan bosatty;

• Meta, ABC News jáne Wall Street Journal medıalarymen sottasyp, mıllıondaǵan dollar ótemaqy talap etti.

Bul - Tramptyń prezıdent retinde birinshi ret sotqa shaǵymdanýy. Alaıda sarapshylar onyń mundaı áreketteri baspasóz bostandyǵyn shekteýge umtylý bolýy múmkin ekenin eskertedi.

Aıta keteıik, Obama Tramptyń memleketke opasyzdyq jasady degen málimdemesin joqqa shyǵardy.