Tramp Federaldyq rezerv júıesi basshylyǵyna jeke keńesshisin usyndy
ASTANA. KAZINFORM – AQSh prezıdenti Donald Tramp Federaldyq rezerv júıesiniń qazirgi tóraǵasy Djerom Paýell ókilettik merzimi aıaqtalǵannan keıin FRJ basshysy qyzmetine óziniń jeke ekonomıkalyq keńesshisi Kevın Ýorshty usyndy. Kandıdatýrany AQSh Senaty bekitýi tıis, dep jazdy DW.
Tramp bul týraly 30 qańtarda Truth Social áleýmettik jelisindegi paraqshasynda jazdy.
– Men Kevındi burynnan bilemin jáne onyń FRJ tarıhyndaǵy eń úzdik tóraǵalardyń birine, bálkim, eń myqtysyna aınalatynyna kúmánim joq. Ol barlyq jaǵynan minsiz jáne eshqashan aldamaıdy, – dep jazdy AQSh prezıdenti.
Kevın Ýorsh 2006-2011 jyldary Federaldyq rezerv júıesiniń basqarýshylar keńesiniń múshesi bolǵan. Ol 35 jasynda taǵaıyndalyp, FRJ tarıhyndaǵy eń jas basqarýshy atanǵan. Buǵan deıin Morgan Stanley bankinde jumys istep, mamandanǵan. Sondaı-aq ol Donald Trampqa ekonomıkalyq saıasat máseleleri boıynsha keńes bergen.
Bloomberg agenttiginiń málimetinshe, Aq úı basshysy ony FRJ tóraǵalyǵynyń negizgi úmitkeri retinde qarastyrǵan.
Aıta keteıik, Donald Tramp qazirgi FRJ basshysy Djerom Paýelldi negizgi paıyzdyq mólsherlemeni aıtarlyqtaı tómendetýden bas tartqany úshin birneshe ret synǵa alǵan. Qańtar aıynda ol Paýelldi aýyr sózdermen balaǵattap, qyzmetinen ketiretinin málimdegen. Ýorshtyń ózi de Federaldyq rezerv júıesin jıi synǵa alyp kelgen.
Djerom Paýelldi FRJ tóraǵasy qyzmetine Tramp óziniń alǵashqy prezıdenttik merzimi kezinde taǵaıyndaǵan. Onyń tóraǵalyq ókilettigi 2026 jylǵy mamyrda aıaqtalǵanymen, basqarýshylar keńesiniń quramynda 2028 jylǵy qańtarǵa deıin qala beredi.
Buǵan deıin Djerom Paýell 11 qańtarda AQSh prokýrorlary onyń Kongress múshelerine bergen málimdemelerine qatysty tekserý bastaǵanyn habarlaǵan. Onyń aıtýynsha, bul áreketter Donald Tramptyń aqsha-nesıe saıasatyna baılanysty qabyldanǵan sheshimder úshin qysym kórsetý naýqanynyń bir bóligi bolýy múmkin.
Al Donald Tramp Ádilet mınıstrliginiń FRJ-ǵa qatysty qandaı da bir tergeý júrgizip jatqany týraly ózine eshteńe málim emes ekenin aıtty.
Bul jaǵdaı Senattaǵy eki partııa ókilderiniń de qatań synyna ushyrady. Respýblıkashyl senator Tom Tıllıs Ádilet mınıstrliginiń táýelsizdigi men oǵan degen senimge nuqsan keldi dep málimdedi. Ol tergeý tolyq aıaqtalǵanǵa deıin FRJ basshylyǵyna usynylatyn kez kelgen kandıdatýrany, sonyń ishinde bolashaq tóraǵany da bekitýge qarsy bolatynyn aıtty.
Aıta keteıik, Tramp AQSh-tyń salyq qyzmetin sotqa berip, 10 mıllıard dollar talap etti.