Tramp: federaldyq polıtsııa demokrattar basqaratyn qalalarǵa kómektesýdi toqtatady
ASTANA. KAZINFORM — AQSh prezıdenti Donald Tramp federaldyq quqyq qorǵaý organdary memleket basshysyna oppozıtsııada turǵan Demokratııalyq partııa baqylaıtyn qalalardyń bıligine jappaı narazylyqtar men tártipsizdikterge qarsy kúreste budan bylaı kómek kórsetpeıtinin málimdedi.
«Men Іshki qaýipsizdik mınıstri Krıstı Noemge nashar basqarylyp otyrǵan demokratııalyq qalalardaǵy narazylyqtar nemese tártipsizdikterge baılanysty quqyq qorǵaý operatsııalaryna eshbir jaǵdaıda qatyspaıtynymyz jóninde nusqaý berdim. Biz tek sol qalalar ózderi bizden kómek suraǵan jaǵdaıda ǵana aralasamyz», dep jazdy ol Truth Social áleýmettik jelisinde.
Onyń aıtýynsha, federaldyq menshiktiń qaýipsizdigin qamtamasyz etý — jergilikti bıliktiń tikeleı mindeti.
«Biz ol jerde tek federaldyq menshikti qorǵaý úshin qosymsha kúsh retinde ǵana bolamyz, óıtkeni bul — jergilikti bılik pen shtattyń mindeti», dep atap ótti AQSh prezıdenti.
«Eger jergilikti bılik búlikshilermen, arandatýshylarmen jáne anarhıstermen óz betimen kúrese almasa, biz kómektiń qajet bolǵan jerine dereý baramyz jáne jaǵdaıdy óte ońaı ári júıeli túrde retteımiz. Los-Andjelestegi tártipsizdikter kezinde ótken jyly dál solaı áreket ettik», dep jazdy Tramp.
«Sondyqtan barlyq shaǵym aıtyp otyrǵan jergilikti bılik ókilderine, gýbernatorlar men merlerge aıtarym: daıyn bolǵan kezde bizge habarlańyzdar, biz sol jerge baramyz. Biraq buǵan deıin sizder «ótinemiz» degen sózdi qoldanýlaryńyz kerek», dep qosty ol.
Sonymen qatar Aq úı basshysy qajet bolǵan jaǵdaıda bul maqsattar úshin qarýly kúshter de paıdalanylýy múmkin ekenin atap ótti.
«Eshkim bizdiń ofıtserlerimizdiń betine túkirmeıdi, olarǵa judyryq jumsap, tepkilemeıdi, kólikterimizdiń shamdaryn syndyrmaıdy jáne mashınalarymyzǵa nemese patrıot jaýyngerlerimizge tas ne kirpish laqtyrmaıdy. Eger osyndaı bolsa, ondaı adamdar saldary úshin teń nemese odan da aýyr dárejede jaýap beredi», dep túıindedi AQSh prezıdenti.
Qańtardyń ortasynda prezıdent Mınnesota shtatynyń bıligine eger olar zańsyz mıgranttarǵa qarsy operatsııa júrgizip jatqan AQSh Immıgratsııa jáne keden qyzmeti (ICE) qyzmetkerlerine jasalǵan shabýyldardy toqtatpasa, XIX ǵasyrdaǵy kóterilisterdi qarýly kúshter arqyly basý týraly zańdy qoldanatynyn aıtyp qorqytqan edi. Naqtylaı tússek, 1807 jyly qabyldanǵan zań týraly bolyp otyr, ol memleket basshysyna el ishinde qarýly kúshterdi paıdalanýǵa quqyq beredi.
Aıta keteıik, Tramp Kýbadan tóngen qaýipke baılanysty AQSh-ta tótenshe jaǵdaı jarııalady.