Tramp federaldyq memlekettik qyzmetkerler sanyn 12%-ǵa qysqartty
ASTANA. KAZINFORM - Donald Tramp ákimshiligi men Memlekettik basqarý tıimdiligin arttyrý departamenti (DOGE) júrgizgen sharalardyń nátıjesinde 2024 jyldan beri federaldyq úkimet qurylymynda 277 myńnan astam qyzmet orny qysqartyldy. Bul týraly Kazinform agenttiginiń Vashıngtondegi menshikti tilshisi FOX Business-ke silteme jasap habarlady.
AQSh Personaldy basqarý basqarmasy (OPM) málimetinshe, 2024 jyldyń qyrkúıegi men 2026 jyldyń qańtary aralyǵynda azamattyq memlekettik qyzmetkerler sany 12%-ǵa azaıyp, 2 313 216 adamnan 2 035 344 adamǵa deıin tómendegen.
Habarlamada aıtylǵandaı, osy kezeńde jumystan bosaǵan qyzmetkerlerdiń basym bóligi qyzmetinen óz erkimen ketken, ıaǵnı qysqartý májbúrli túrde júrgizilmegen.
Donald Tramp ákimshiligi memlekettik qyzmetkerler sanyn qysqartý nátıjesinde bıýdjetten mıllıardtaǵan dollar únemdelgenin málimdedi. Sonymen qatar prezıdenttiń saıasaty jeke sektorda jańa jumys oryndaryn ashýǵa yqpal etip jatqany aıtyldy.
— Prezıdent Tramp kezeńinde qurylǵan barlyq jańa jumys oryndary jeke sektorda paıda boldy. Al federaldyq úkimettegi jumyspen qamtý deńgeıi 1966 jyldan bergi eń tómengi kórsetkishke tústi. Bul salyq tóleýshilerge jyl saıyn shamamen 29 mlrd dollar únemdeýge múmkindik beredi, — dedi Aq úıdiń aımaqtyq baspasóz hatshysy Lız Hıýston.
Donald Tramp Aq úıdegi alǵashqy jumys kúninde Memlekettik basqarý tıimdiligin arttyrý departamentin (DOGE) ýaqytsha qurylym retinde qurý týraly jarlyqqa qol qoıǵan. Bul organnyń qyzmet merzimi 2026 jyldyń 4 shildesine deıin belgilengen.
Jarlyqqa sáıkes jańa qyzmetkerlerdi qabyldaýǵa ýaqytsha moratorıı engizilip, jańa kadrlardy jaldaý jospary bekitilgen. Ol boıynsha memlekettik mekemeler jumystan ketken ár tórt qyzmetkerdiń ornyna tek bir jańa qyzmetker qabyldaı alady.
Buǵan deıin AQSh ekonomıkasy 2026 jyldyń aqpan aıynda 92 myń jumys ornyn joǵaltqany habarlanǵan.
Al qyrkúıekte AQSh 32 myń jumys ornyn qysqartty.