Tramp Federaldyq qor júıesiniń basshysy laýazymyna óziniń jeke keńesshisin usyndy
ASTANA. KAZINFORM – Federaldyq qor júıesi Basqarýshylar keńesiniń burynǵy múshesi Kevın Ýorsh AQSh Senaty bekitkennen keıin onyń jańa tóraǵasy bolady. Ol buǵan deıin Donald Trampqa ekonomıkalyq saıasat máseleleri boıynsha keńes bergen, dep habarlaıdy DW aqparat agenttigi.
AQSh prezıdenti Donald Tramp Djerom Paýeldiń merzimi mamyr aıynda aıaqtalǵannan keıin Federaldyq qor júıesin (FQJ) basqarý laýazymyna Kevın Ýorshty usyndy.
- Men Kevındi kópten beri bilemin jáne onyń tarıhta FQJ-nyń eń uly, tipti eń úzdik tóraǵalarynyń biri retinde qalatynyna kúmánim joq. Sonymen qatar ol minsiz jáne kóńilińizdi eshqashan qaldyrmaıdy, - dep jazdy Tramp juma, 30 qańtarda óziniń Truth Social áleýmettik jelisindegi akkaýntynda.
Ýorshtyń kandıdatýrasyn AQSh Senaty rastaýy kerek.
Kevın Ýorsh 2006-2011 jyldar aralyǵynda FQJ Basqarýshylar keńesinde qyzmet etti, taǵaıyndalǵan kezde jasy 35-te edi. Ol FQJ tarıhyndaǵy eń jas múshe boldy. Ýorsh buǵan deıin Morgan Stanley kompanııasynda birigýler men satyp alýlarǵa mamandanǵan bankır bolyp jumys istedi jáne atap aıtqanda, Trampqa ekonomıkalyq saıasat máseleleri boıynsha keńes berdi. Bloomberg agenttiginiń buǵan deıin habarlaýynsha, Aq úı ony jetekshi kandıdat retinde qarastyryp otyr.
AQSh prezıdenti FQJ qazirgi basshysy Djerom Paýeldi negizgi paıyzdyq mólsherlemeni aıtarlyqtaı tómendetýden bas tartqany úshin synǵa alyp, qańtarda ony «aqymaq» dep atap, qyzmetinen bosatýǵa ýáde berdi. Ýorsh ta FQJ-ny jıi synǵa aldy. Tramp Paýeldi óziniń birinshi prezıdenttik merziminde FQJ tóraǵasy etip taǵaıyndaǵan. Ókilettik merzimi 2026 jyldyń mamyr aıynda aıaqtalatynyna qaramastan, ol Basqarýshylar keńesiniń quramyna 2028 jyldyń qańtaryna deıin kiredi.
Buǵan deıin Tramp FQJ tóraǵasy qyzmetine úmitkerler sanyn azaıtqanyn jazdyq.