Tramp eýropalyq kóshbasshylarmen áńgimeleskenin aıtty
ASTANA. KAZINFORM — Eýropalyq kóshbasshylar men AQSh prezıdenti arasynda Ýkraınadaǵy jaǵdaıǵa qatysty telefon arqyly sóılesý kezinde janjal shyqty. Bul týraly Aq úı basshysy Donald Tramptyń ózi habarlady, dep jazdy DW aqparat agenttigi.
Frantsııa prezıdenti Emmanıýel Makron, GFR kantsleri Frıdrıh Merts jáne Ulybrıtanııa premer-mınıstri Kır Starmer sársenbi, 10 jeltoqsanda AQSh prezıdenti Donald Tramppen Ýkraınadaǵy jaǵdaıdy talqylaý úshin telefon arqyly 40 mınýt sóılesken.
Elıseı saraıynyń habarlaýynsha, áńgimeniń maqsaty beıbitshilik ornatýǵa qatysty máseleler boıynsha talqylaýlardy «ilgeriletý» bolǵan.
— Meniń oıymsha, bizde adamdarǵa qatysty azdap kelispeýshilik boldy. Biz kezdeskenge deıin qalaı bolatynyn kóreıik dedik, — dep túsindirdi Donald Tramp.
Amerıka kóshbasshysy «aýyr sózder» neni meńzep turǵanyn naqtylaǵan joq.
Málimdemege sáıkes, konsýltatsııalarǵa qatysýshylar bul Ýkraına, onyń halqy jáne eýroatlantıkalyq keńistiktegi jalpy qaýipsizdik úshin synı sát ekenimen kelisti.
Sondaı-aq Merts, Makron jáne Starmer AQSh-tyń Ýkraınada turaqty beıbitshilikke qol jetkizý jónindegi kúsh-jigerin joǵary baǵalady.
Tramptyń aıtýynsha, eýropalyq kóshbasshylar AQSh ókilderiniń osy aptanyń sońynda Eýropada ótetin Ýkraına boıynsha kezdesýge qatysýyn qalaıtynyn bildirdi. Oǵan Ýkraına basshysy Vladımır Zelenskıı de qatysady.
— Biz olardyń nemen oralatynyna baılanysty sheshim qabyldaımyz. Ýaqytty bosqa ketirgimiz kelmeıdi, — dep atap ótti AQSh prezıdenti.
Beısenbi, 11 jeltoqsanda «eriktiler koalıtsııasy» atalǵan uıymnyń ókilderi Ýkraınanyń qaýipsizdik máselelerin talqylaý úshin Ulybrıtanııa men Frantsııanyń birlesken tóraǵalyǵymen beınekonferentsııa ótkizýdi josparlap otyr. Frantsııa úkimetiniń ókili AQSh-tyń yqtımal úlesi de talqylanatynyn málimdedi. Ýkraınany qoldaıtyn «eriktiler koalıtsııasyna» basym kópshiligi eýropalyq 30 el kirip otyr.
Úsh aptadaı ýaqyt buryn Tramptyń Ýkraınadaǵy beıbitshilik josparynyń barlyq 28 tarmaǵy jarııalanǵan.
Buǵan deıin Ýkraına AQSh-qa beıbit jospar jobasyna bergen jaýabyn joldaǵanyn jazǵan bolatynbyz.