Tramp Er-Rııadta Sırııa prezıdentimen kezdesti
ASTANA.KAZINFORM - AQSh sanktsııalarynyń alynýy aıasynda Donald Tramp Sırııa prezıdenti Ahmed ash-Sharaamen alǵashqy resmı kezdesý ótkizip, Vashıngton men Damask arasyndaǵy qarym-qatynastyń jańa kezeńin ashty, dep habarlaıdy Kazinform tilshisi.
AQSh prezıdenti Donald Tramp sársenbi kúni Saýd Arabııasynda Sırııanyń ýaqytsha prezıdenti Ahmed ash-Sharaamen kezdesti. Bul - eki el basshylarynyń sońǵy 25 jyldaǵy alǵashqy kezdesýi.
AQSh pen Sırııa prezıdentteriniń kezdesýi Aq úı basshysy Sırııaǵa qarsy barlyq sanktsııalary joıylatynyn málimdegennen keıin ótti.
Túrkııa prezıdenti Rejep Taıyp Erdoǵan da Tramp, ash-Shara jáne Saýd Arabııasynyń murager hanzadasy Muhammed bın Salman arasyndaǵy kezdesýge vıdeo baılanys arqyly qosyldy.
- Kezdesý barysynda Erdoǵan Trampty Sırııaǵa salynǵan sanktsııalardy alyp tastaǵany úshin madaqtap, Sırııanyń beıbitshiligi men gúldenýin ilgeriletý úshin Saýd Arabııasymen birge jumys isteý mindetin óz moınyna aldy, dep habarlady Aq úı.
Jaýap retinde Tramp Erdoǵan men bın Salmanǵa dostyq qatynastary úshin alǵys aıtyp, ash-Sharaaǵa «óz elinde tarıhı dúnıe jasaýǵa» úlken múmkindik bar ekenin aıtty.
Aq úıdiń baspasóz hatshysy Kerolaın Levıttiń málimdemesine sáıkes, Tramp Sırııa basshysyn Izraılmen Avraamov kelisimine qol qoıýǵa, sheteldik lańkesterdiń joıylýyn qamtamasyz etýge, AQSh-qa DAISh-tiń qaıta jandanýynyń aldyn alýǵa kómektesýge jáne Sırııanyń soltústik-shyǵysyndaǵy DAISh-tiń ýaqytsha ustaý ortalyqtary úshin jaýapkershilikti alýǵa shaqyrdy.
Jaýap retinde ash-Sharaa kezdesýdi uıymdastyrǵany úshin Tramp, Erdoǵan jáne bın Salmanǵa alǵys aıtyp, Sırııanyń Shyǵys pen Batys arasyndaǵy saýdany jeńildetetin mańyzdy býynǵa aınalatynyna ýáde berdi jáne amerıkalyq kompanııalardy Sırııanyń munaıy men gazyna ınvestıtsııa salýǵa shaqyrdy.
- Tramptyń Parsy shyǵanaǵy Yntymaqtastyq keńesiniń jetekshilerimen sammıti aıasynda ótken kezdesý Sırııadaǵy oqıǵalardyń mańyzdy betburystaryn kórsetedi, dep jazady Associated Press.
Bul Tramppen betpe-bet kezdesý Sırııanyń halyqaralyq oqshaýlanýyn toqtatýǵa kómektesetinine sengen sırııalyqtar men olardyń túrik jáne saýdııalyq odaqtastarynyń birneshe aılyq dıplomatııasynyń sharyqtaý shegi boldy.
Buǵan deıin Sırııa úkimeti Tramp ákimshiligine Sırııa munaıyna qol jetkizý, Izraıldiń qaýipsizdigine kepildik berý jáne Damaskide «Tramp munarasyn» salý týraly usynysty jibergen bolatyn.
AQSh pen Saýd Arabııasy 142 mıllıard dollarlyq qarý-jaraq kelisimine qol qoıdy.