Tramp Epshteınmen eshqandaı baılanysy joq ekenin málimdedi

ASTANA. KAZINFORM — AQSh prezıdenti Donald Tramp marqum mıllıarder Djeffrı Epshteınniń qylmystaryna qandaı da bir qatysy bar ekenin joqqa shyǵardy, dep habarlaıdy NDTV.

Seısenbi kúni Tramp seksýaldyq sıpattaǵy qylmystar jasaǵan marqum Epshteınmen qandaı da bir baılanysyn joqqa shyǵaratyn málimdeme jasady.

— Epshteınniń faıldaryna keletin bolsaq… Meniń Djeffrı Epshteınge esh qatysym joq. Men ony kóp jyl buryn klýbymnan qýyp jiberdim, sebebi ony aýrý, azǵyn adam dep oıladym, — dep málimdedi Donald Tramp Aq úıde tilshilerge bergen suhbatynda.

Epshteın 2019 jylǵy 6 shildede Nıý-Iork shtatynda ustaldy. Prokýratýra onyń 2002–2005 jyldary Manhettendegi úıine ondaǵan kámeletke tolmaǵan qyzdardy (eń kishisi 14 jasta) shaqyrǵanyna dálel bar ekenin málimdedi. Epshteınniń dostary men tanystary arasynda AQSh pen ózge elderdiń qazirgi jáne burynǵy sheneýnikteri, burynǵy memleket basshylary, iri kásipkerler men shoý-bıznes juldyzdary bolǵan.

Epshteınge qatysty qylmystyq is 2019 jylǵy 10 tamyzda túrme kamerasynda óz-ózine qol jumsaǵannan keıin toqtatyldy.

Shilde aıynda Tramp Epshteınmen baılanysy týraly jazǵany úshin Wall Street Journal-dy sotqa beretinin jazǵan bolatynbyz. 

Tramp WSJ-ge jarııalanǵan maqaladan keıin medıamagnat Merdokty sotqa berdi. 

Sondaı-aq Ilon Mask pen hanzada Endrıý Epshteın isiniń sońǵy qujattarynda atalǵany belgili boldy. 

Osydan keıin brıtandyq prınts Endrıý Iork gertsogi tıtýlynan bas tartty. 

AQSh Kongresiniń Ókilder palatasy atyshýly qarjyger Djeffrı Epshteınge qatysty is materıaldaryn jarııalaýdy talap etetin zań jobasyn kópshilik daýyspen qoldady. 

Qujatty 427 zań shyǵarýshy qoldap, tómengi palatanyń bir múshesi qarsy daýys berdi. Endi zań jobasy AQSh Senatynyń qaraýyna jiberiledi. Eger Kongresstiń joǵarǵy palatasy maquldasa, ol AQSh prezıdenti Donald Tramptyń qol qoıýyna jiberiledi.