Tramp EO tarıfterin 9 shildege deıin shegerdi
ASTANA. KAZINFORM — AQSh prezıdenti Donald Tramp Eýropalyq Odaqqa saýda kelisimi boıynsha kelissózder júrgizýge kóbirek ýaqyt berip, barlyq eýropalyq ımportqa 50 paıyzdyq baj salyǵyn engizýdi 9 shildege qaldyrdy, dep jazady The New York Times.
Tramp Eýropalyq komıssııa tóraǵasy Ýrsýla fon der Lıaıenmen sóıleskenin habarlady. Ol sóılesýge kóbirek ýaqyt surady jáne kelissózder tez bastalatynyna sendirdi.
— Búgin maǵan Eýropalyq komıssııanyń tóraǵasy Ýrsýla fon der Lıaıen qońyraý shalyp, saýda men Eýropalyq Odaqqa salynatyn 50% tarıfti 1 maýsymǵa deıin uzartýdy surady. Men 2025 jyldyń 9 shildesine deıin uzartýǵa kelistim. Komıssııa tóraǵasy kelissózder tez bastalatynyn aıtty, — dep jazdy Donald Tramp Truth Social-da.
Tramp ákimshilikti qanaǵattandyratyn kelisimge qol jetkizý úshin 90 kúndik úziliste saýda jeńildikterin usynýda baıaý bolǵan EO-men kelissózderge kóńili tolmaıtynyn bildirdi.
Buǵan deıin juma kúni Tramp Eýropalyq Odaqpen kelissózderdiń «eshbir nátıje bermeıtinin» jazyp, sondyqtan 50 paıyzdyq baj salyǵyn engizýdi usyndy.
— Olardyń kúshti saýda kedergileri, qosylǵan qun salyǵy, korporatıvtik aıyppuldar, monetarlyq manıpýlıatsııalar, amerıkalyq kompanııalarǵa qarsy ádiletsiz jáne negizsiz sot protsesteri jáne taǵy basqalary Amerıka Qurama Shtattarymen jylyna 250 000 000 dollardan astam saýda tapshylyǵyna ákeldi, bul múldem qolaısyz. Olarmen sóılesýimiz esh nátıje bermeıdi! Sondyqtan Eýropalyq Odaq úshin 50 paıyzdyq tarıf engizýdi usynamyn. Ónim AQSh-ta jasalǵan bolsa, tarıf alynbaıdy, — dep jazdy Donald Tramp Truth Social áleýmettik jelisinde.
2 sáýirde Tramp ondaǵan elge, sonyń ishinde EO memleketterine 10-nan 50 paıyzǵa deıin ımporttyq baj salyǵyn engizetinin málimdedi. Keıinirek ol 75-ten astam el úshin tarıfterdi 90 kúnge keshiktirýge sheshim qabyldady. Sonymen qatar, AQSh bolat, alıýmınıı jáne týyndy ónimderge, sondaı-aq EO-dan keletin kólikterge 25 paıyzdyq baj salyǵyn engizdi. Buǵan jaýap retinde Eýropalyq Odaq amerıkalyq taýarlardyń eksportyna qarsy sharalar engizý josparyn jarııalady.