Tramp EO ónimderine keminde 15–20% kedendik baj engizýdi talap etip otyr

ASTANA. KAZINFORM — AQSh prezıdenti Donald Tramp Eýropalyq odaqtan (EO) ákelinetin ónimderge keminde 15–20% kóleminde kedendik baj salyǵyn engizýdi talap etip otyr, dep habarlaıdy TASS. 

Bul týraly Financial Times basylymy Vashıngton ákimshiligindegi derekkózderge silteme jasap habarlady.

Basylymnyń málimetinshe, sońǵy aptalarda Vashıngton men Brıýssel EO-dan keletin ónimderdiń kópshiligine salynatyn baj salyǵyn 10%-ǵa deıin tómendetý týraly kelissózder júrgizip kelgen. Alaıda gazet Eýroodaq mundaı kelisimge kelýge daıyn emes ekenin, sebebi 15% deńgeıindegi baj mólsherlemesi olar úshin qolaısyz ekenin atap ótti.

Buǵan deıin Donald Tramp 1 tamyzdan bastap EO-dan keletin barlyq eksportqa 30% kedendik baj salyǵy engiziletinin jarııalaǵan bolatyn. Bul buryn engizilgen 10% baj salyǵynan bólek — olar bolat, alıýmınıı jáne avtomobılderge qatysty.

Jaýap retinde Eýrokomıssııa tóraıymy Ýrsýla fon der Lıaıen bul sharalar transatlantıkalyq jetkizý tizbegine qaýip tóndiretinin aıtyp, 1 tamyzǵa deıin qandaı jaǵdaı bolsa da kelisimge qol jetkizýge shaqyrdy.

Saýda jónindegi Eýrokomıssar Marosh Shefchovıch EO AQSh-tyń baj salyǵyn joıýyn talap etetinin rastady. Sonymen qatar, eger kelissózder nátıje bermese, Eýroodaq AQSh-tan jylyna 72 mıllıard eýro kólemindegi eksporttyq taýarlarǵa qarsy baj salyǵyn engizýge daıyn ekenin málimdedi.

Aıta ketelik Kalıfornııa Tramp ákimshiligin sotqa bergen edi.