Tramp EO-nyń 8 eline salynatyn baj salyǵyn alyp tastady

ASTANA. KAZINFORM — Tramp NATO bas hatshysymen kelissózden keıin Eýropalyq Odaqtyń 8 eline salynatyn baj salyǵyn alyp tastady. Aq úı basshysy bul málimdemeni Davostaǵy sóılegen sózinen keıin birneshe saǵat ótken soń jasady. Tramp Grenlandııa AQSh-qa ulttyq jáne jahandyq qaýipsizdik úshin qajet ekenin aıtty, dep habarlaıdy Euronews. 

AQSh prezıdenti Donald Tramp Davostaǵy Grenlandııa máselesi boıynsha NATO-nyń bas hatshysy Mark Rıýttemen kelissózde ilgerileýshilik bar ekenin aıtyp, Eýropanyń 8 eline baj salyǵyn salmaıtynyn málimdedi.

Tramp eki lıderdiń nátıjeli dep sıpattaǵan kelissózinde Grenlandııa boıynsha bolashaq kelisimniń negizine qol jetkizgenin aıtty. Yqtımal kelisimniń Amerıka Qurama Shtattary men NATO-nyń barlyq múshelerine paıda ákeletinin jetkizdi.

— Osy túsinistikke súıene otyryp, men 1 aqpanda kúshine enýi tıis tarıfterdi salmaımyn, — dep jazdy Tramp Truth Social saıtynda.

Dúnıejúzilik ekonomıkalyq forýmnyń bastalýyna birneshe kún qalǵanda jarııalanǵan tarıfter Frantsııa, Germanııa, Ulybrıtanııa, Danııa, Shvetsııa, Norvegııa, Nıderlandy jáne segizinshi eldiń taýarlaryna 10 paıyzdan bastalyp, maýsym aıynda 25 paıyzǵa deıin kóterilýi kerek edi.

Tramp Eýropa elderi AQSh-tyń Grenlandııany Danııadan satyp alýyn qoldamaıynsha, alymdardy saqtaýdy talap etti. Ol kelissózderdi AQSh vıtse-prezıdenti Djeı Dı Vens, memlekettik hatshy Marko Rýbıo, arnaıy elshi Stıv Ýıtkoff jáne oǵan tikeleı esep beretin basqa da resmı tulǵalar júrgizetinin aıtty.

Tramp sonymen birge AQSh-tyń Arktıkalyq aralǵa baqylaý ornatý úshin kúsh qoldaný múmkindigin joqqa shyǵardy.

Rıýtte sársenbide Davostaǵy sóılegen sózinde Grenlandııa boıynsha sheshimderdi tabýǵa nıetti ekenin bildirdi.

Buǵan deıin Donald Tramp Davosta ótken forýmda sóz sóılep, «Eýropa durys baǵytta emes» dep málimdedi.