Tramp elden erikti túrde ketkisi keletin zańsyz mıgranttarǵa qarjylaı kómek pen ushaq bıletin usyndy

ASTANA. KAZINFORM — Tramp elden ketkisi keletin zańsyz mıgranttarǵa tyń usynys tastady, dep jazdy Anadoly.

AQSh prezıdenti Donald Tramp elden óz erkimen ketkisi keletin zańsyz mıgranttarǵa qarjylaı kómek pen ushaq bıletin usynatyn jańa usynysy baryn málimdedi. Bul týraly Aq úı basshysy Fox News amerıkalyq telearnasyna bergen suhbatynda aıtty.

Tramp qazirgi kezde AQSh bıligi «qaýipti» mıgranttardy elden deportatsııalaý isin jalǵastyryp jatqanyn, sondaı-aq elden ketýge nıetti zańsyz mıgranttarǵa arnalǵan baǵdarlama daıyndap jatqanyn jetkizdi.

Prezıdenttiń aıtýynsha, jańa mıgratsııalyq bastama olarǵa qarjylaı kómek kórsetip, ushaq bıletin qamtamasyz etýdi qarastyrady.

– Eger olar tártipti bolyp, óz eline oralýǵa nıet bildirse, biz olardy múmkindiginshe tez qaıtarý úshin birlesip áreket etemiz, – dedi ol. 

Saılaýaldy naýqany kezinde Tramp «mıllıondaǵan mıgrantty» deportatsııalaý jospary bar ekenin málimdegen bolatyn. Óz kezeginde AQSh vıtse-prezıdenti Djeıms Devıd Vens bul jumysty 1 mıllıon mıgranttan bastaýǵa bolatynyn aıtqan.

Zańsyz ımmıgratsııaǵa qarsy kúres aıasynda Donald Tramp buǵan deıin tek soǵys kezinde qoldanylǵan 1798 jylǵy «Sheteldik jaýlar týraly zańdy» («Alien Enemies Act») paıdalanyp, «sheteldik terrorıstik uıymdarmen» baılanysy bar mıgranttardy elden jedel shyǵarý sharalaryn iske asyrǵan edi.

Eske sala keteıik, buǵan deıin Tramp zańsyz ımmıgranttar úshin baspana bolǵan qalalar qarjylandyrýdan aıyrylatynyn málimdegen edi.