Tramp eki qudasyn joǵary memlekettik qyzmetke usyndy
ASTANA.KAZINFORM - AQSh-tyń jańadan saılanǵan prezıdenti Donald Tramp lıvandyq mıllıarder-bıznesmen Massad Býlosty arab jáne Taıaý Shyǵys isteri boıynsha aǵa keńesshi qyzmetine taǵaıyndamaqshy, dep jazady CBS News.
Donald Tramp jeksenbi kúni Truth Social áleýmettik jelisindegi jazbasynda Massad Býlosty keńesshi etip tańdaıtynyn jarııalady.
– Massad – tájirıbeli zańger jáne úlken halyqaralyq tájirıbesi bar bedeldi bıznes kóshbasshy. Ol uzaq ýaqyttan beri respýblıkalyq jáne konservatıvti qundylyqtardy jaqtap keledi, meniń naýqanymdy qoldap, arab-amerıka qaýymdastyǵymen jańa koalıtsııa qurýda mańyzdy ról atqardy, - dep jazdy Tramp.
Ol Massad Býlosty «AQSh pen onyń múddesin qorǵaı» alatyn «Taıaý Shyǵystaǵy bitimger jáne beıbitshilikti jaqtaýshy» dep sıpattady.
Jańa keńesshi - Donald Tramptyń jańa ákimshilikte basshylyq laýazymyna saılanǵan ekinshi týysy. Massad Býlostyń uly Maıkl Býlos 2022 jyly Tramptyń qyzy Tıffanıge úılengen.
Truth Social-da senbi kúni jarııalaǵan habarlamasynda Tramptyń qyzy Ivankanyń qaıyn atasy Charlz Kýshnerdiń Frantsııadaǵy elshi qyzmetine usynylǵanyn habarlady. Ivankanyń kúıeýi Djared Kýshner Donald Tramptyń prezıdent retindegi birinshi merziminde aǵa keńesshisi bolǵan.
Truth Social veb-saıtynda Tramp Charlz Kýshnerdi «bizdiń elimiz ben múddemizdi qorǵaıtyn tamasha isker kóshbasshy, fılantrop jáne kelissóz júrgizýdiń sheberi» dep atady.
Biraz ýaqyttan keıin jańadan saılanǵan prezıdent Donald Tramptyń aýyspaly toby Aqúımen ózara túsinistik týraly memorandýmǵa qol qoıdy, oǵan sáıkes kelesi ákimshilik óz is-qımylyn federaldy agenttiktermen úılestirip otyra alady.
Buǵan deıin Tramp óziniń bolashaq ákimshiligine alǵashqy taǵaıyndaýlar jasaǵan bolatyn. Sodan keıin ol Pentagonnyń jańa basshysy kim bolatynyn atady. Al mıllıarder Ilon Maskqa úkimettiń tıimdilik departamentin basqarýdy usyndy.
Ol sondaı-aq Densaýlyq saqtaý mınıstrliginiń basshysy laýazymyna kishi Kennedıdiń kandıdatýrasyn usyndy, AQSh Memlekettik departamenti men Ulttyq barlaý basqarmasynyń basshylaryn jáne Aqúıdiń jańa baspasóz hatshysyn taǵaıyndady.
Sonymen qatar, Tramp AQSh-tyń energetıka mınıstri laýazymyna Liberty Energy munaı kompanııasynyń basshysyn tańdady.
Donald Tramp óziniń burynǵy ekonomıkalyq keńesshisi Kevın Hassetti Aq úıdiń Ulttyq ekonomıkalyq keńesiniń basshylyǵyna usyndy.
Ol sondaı-aq mıllıarder Skott Bessentti qarjy mınıstri laýazymyna usyndy.