Tramp eki kún ishinde Býdapeshtegi Pýtınmen kezdesýine qatysty málimdeme jasamaq

ASTANA. KAZINFORM – AQSh prezıdenti Donald Tramp Reseı basshysy Vladımır Pýtınmen Býdapeshtte ótýi múmkin kezdesýge qatysty sheshimin aldaǵy eki kún ishinde jarııalanatynyn málimdedi, dep habarlaıdy TASS.

Bul týraly Tramp seısenbi kúni Aq úıde jýrnalıstermen bolǵan áńgime barysynda aıtty.

Odan jýrnalıster Reseı prezıdentimen bolýy múmkin kezdesý jaıly pikirine qatysty túsinikteme berýin suraǵan. Buǵan deıin ol «ýaqytty bosqa ótkizbeýdi qalaıtynyn» aıtqan edi. Alaıda Tramp bul sóziniń burmalanǵanyn aıtyp, tómendegideı jaýap qatty:

«Men eshteńe aıtqan joqpyn. Bul (kezdesý) ýaqytty bosqa ótkizýmen birdeı bolar edi dep men aıtpadym», dedi Aq úı basshysy.

Sonymen qatar ol qazirgi kezde bul baǵytta kóptegen protsester júrip jatqanyn atap ótti.

«Biz aldaǵy eki kún ishinde atalǵan máselege qatysty áreketterimizdi habarlaımyz. Qazir bul baǵytta kóp nárse bolyp jatyr», dep qosty Tramp.

Eske sala keteıik, Tramptyń bul málimdemesi Reseı men AQSh arasyndaǵy yqtımal sammıttiń Býdapeshtte ótý múmkindigi jaıly aıtylǵan tusta jasalyp otyr.

Aıta ketsek, Zelenskıı Býdapeshtte Tramp pen Pýtınniń kezdesýine qatysýǵa daıyn.

Sondaı-aq Rýbıo men Lavrov Tramp-Pýtın kelissózin talqylady.