Tramp Djon Kennedıdiń ólimine qatysty myńdaǵan qujatty jarııalaıdy

ASTANA. KAZINFORM – Prezıdent Donald Tramp óziniń ákimshiligi prezıdent Djon Kennedıdiń óltirilýine qatysty 80 myńǵa jýyq betten turatyn qujatty seısenbi kúni tústen keıin jarııalaıtynyn málimdedi, dep habarlaıdy The New York Times. 

Tramp faıldarǵa ne kiretini týraly qosymsha málimet bergen joq, biraq ol redaktsııalanbaǵan qujattardy jarııalaýdy kópten ýáde berdi.

Aq úıdegi ekinshi merzimi bastalǵannan keıin birneshe kún ótken soń Tramp burynǵy prezıdent Kennedı men doktor Martın Lıýter Kıngti óltirýge qatysty barlyq úkimettik qujatty jarııalaýdy talap etetin atqarýshylyq jarlyqqa qol qoıdy.

Djon Kennedıdiń óltirilýi uzaq ýaqyt boıy qastandyq teorııalaryn, sonyń ishinde Tramptyń ózi qoldaǵan teorııalardy kúsheıtti. Qujattardyń jarııalanýyn tarıhshylar da taǵatsyzdana kútti.

1992 jylǵy zań úkimetten prezıdent Kennedıdiń óltirilýine qatysty qujattardy ulttyq qaýipsizdikke nuqsan keltirýi múmkin qujattardy qospaǵanda, 25 jyl ishinde jarııalaýdy talap etti. 2017 jyly Tramp keıbir qosymsha qujattardy jarııalady, biraq ol sonymen birge barlaý agenttikterine faıldardy baǵalaýǵa kóbirek ýaqyt berdi.

Ulttyq muraǵattar men qujattar basqarmasynyń málimdeýinshe, úkimet 1992 jyldan beri qaraǵan shamamen 320 myń qujattyń 99 paıyzyn jarııalady. Alaıda myńdaǵan qujat áli de tolyǵymen nemese ishinara jasyrylǵan bolyp qalyp otyr.

Buǵan deıin Tramp Kennedı men Martın Lıýter Kıngke jasalǵan qastandyqtyń betin ashpaqshy ekenin jazǵan bolatynbyz.