Tramp dybystan jyldam avıatsııany damytý týraly jarlyqqa qol qoıdy

ASTANA. KAZINFORM – AQSh prezıdenti Amerıka bul salada bir kezderi álemdik kóshbasshy bolǵanyn atap ótti, dep habarlaıdy TASS.

AQSh Prezıdenti Donald Tramp dybystan jyldam avıatsııany damytýdy qaıta jandandyrýǵa járdemdesýge baǵyttalǵan atqarýshylyq jarlyqqa qol qoıdy. Bul týraly Aq úıdiń baspasóz qyzmeti habarlady.

— Amerıka bir kezderi dybystan jyldam avıatsııa salasynda álemdik kóshbasshy bolǵan, alaıda birneshe onjyldyqtar boıy qoıylǵan qatań shekteýler bul baǵyttaǵy progresti toqtatty. Bul jarlyq normatıvtik kedergilerdi joıa otyryp, amerıkalyq kompanııalardyń dybystan jyldam ushýlar salasynda qaıtadan kósh bastaýyna múmkindik beredi, — delingen Aq úı málimdemesinde.

Habarlama mátinine sáıkes, jarlyq AQSh-tyń Azamattyq avıatsııa federaldy basqarmasyna dybystan jyldam ushaqtarǵa qatysty ushý shekteýlerin alyp tastaýdy jáne osyndaı áýe kemelerine arnalǵan memlekettik sertıfıkattaý standarttaryn bekitýdi tapsyrdy. Sondaı-aq qujatta AQSh pen basqa elder arasynda halyqaralyq dybystan jyldam áýe qatynastaryn uıymdastyrý úshin kelisimder jasasý qarastyrylǵan.

Sońǵy ret azamattyq dybystan jyldam ushaq retinde qyzmet kórsetken áýe kemesi — Concorde boldy. Ol Ulybrıtanııa men Frantsııa úkimetteriniń birlesken jobasy negizinde jasalǵan. Bul ushaqtyń kommertsııalyq qoldanysy 2003 jyly toqtatyldy. Buǵan 2000 jyly bolǵan apat sebep boldy, onyń saldarynan 203 jolaýshy qaza tapqan. Azamattyq avıatsııa tarıhynda jolaýshylardy dybystan jyldam áýe laınerimen tasymaldaý tek eki ushaqpen júzege asyryldy: keńestik Tý-144 jáne Concorde.

Aıta ketelik Donald Tramp pen Ilon Mask arasyndaǵy shıelenis jeke aıyptaýlar men qoqan-loqylarǵa ulasty.