Tramp dári-dármek baǵasyn 80%-ǵa deıin tómendetpek

AQSh prezıdenti Donald Tramp retsept boıynsha beriletin farmatsevtıkalyq preparattardyń qunyn 30–80%-ǵa deıin tómendetetin jarlyqqa qol qoıýdy josparlap otyr, dep habarlaıdy Kazinform menshikti tilshisi. 

AQSh basshysy eldegi dári-dármektiń baǵasy «kez kelgen basqa elge qaraǵanda áldeqaıda qymbat ekenin, keıde tipti bes-on ese joǵary ekenin» aıtyp, «bul jaǵdaıdy túsindirý qashan da qıyn bolǵanyn, sebebi naqty jaýaby joq» ekenin jetkizdi.

— Farmatsevtıkalyq kompanııalar kóp jyldar boıy bul baǵany zertteýler men ázirlemelerge jumsalǵan shyǵyndarmen baılanystyryp keldi. Alaıda barlyq shyǵyn esh sebepsiz tek halyqtyń qaltasyna júktelip keldi, — dep jazdy Donald Tramp Truth Social jelisinde.

Prezıdent farmkompanııalardyń saılaýaldy naýqanǵa bergen demeýshilikteri ózine de, Respýblıkalyq partııaǵa da áser etpeıtinin atap ótti.

— Biz ádil sheshim qabyldaımyz. Erteń tańǵy saǵat 9:00-de Aq úıde elimizdiń tarıhyndaǵy eń mańyzdy atqarýshy jarlyqtardyń birine qol qoıatynymdy qýana habarlaımyn. Retseptpen beriletin dári-dármekter men ózge de farmatsevtıkalyq ónimderdiń baǵasy birden 30-80%-ǵa deıin tómendeıdi, — dedi Tramp.

Onyń aıtýynsha, bul qadam «kóp jyldan bergi alǵashqy ádilettilik» bolady jáne AQSh azamattarynyń densaýlyq saqtaý salasyna ketetin shyǵyndary «buryn-sońdy bolmaǵan deńgeıde» qysqarady.

Atalǵan jarlyq AQSh Densaýlyq saqtaý jáne áleýmettik qyzmetter mınıstrligine (mınıstri — Robert Kennedı-kishi) Baıden ákimshiligi ınflıatsııany tómendetý týraly zań aıasynda engizgen Medicare dári-dármek baǵasy boıynsha kelissózder baǵdarlamasyna qatysty túsiniktemeler jınaýdy mindetteıdi. Bul baǵdarlama Medicare júıesine farmkompanııalarmen baǵa boıynsha tikeleı kelissóz júrgizýge múmkindik beredi, dep habarlaıdy Fox News.

Buǵan deıin Tramp prezıdenttikke kelgen sátten bastap qandaı ýádelerin oryndaǵany jarııalanǵan bolatyn.