Tramp dári-dármek, aýyr júk kólikteri men jıhazdarǵa baj salyǵyn engizbek

ASTANA. KAZINFORM – AQSh prezıdenti Donald Tramp ımporttyq brendtik dári-dármekke 100%, aýyr júk kólikterine 25%, as úı garnıtýrlaryna 50% jáne jumsaq jıhazǵa 30% jańa tarıfter engiziletinin jarııalady, dep habarlaıdy NBC News. 

Aýyr júkterdi tasýǵa arnalǵan kólikterge jańa tarıfter Paccar (PCAR.O Peterbilt jáne Kenworth kompanııalaryna tıesili) jáne Daimler Truck (DTGGe.DE Freightliner) sııaqty amerıkalyq óndirýshilerdiń «ádiletsiz básekelestiginen» qorǵaýǵa arnalǵan.

Tramp atap ótkendeı, jańa baj salyǵy otandyq óndirýshilerge ımporttyń úlken kólemine baılanysty zııanyn tıgizetin as úı garnıtýrlaryna, santehnıkalyq qurylǵylarǵa jáne jıhazdyń keıbir túrlerine engizilgen.

Alaıda AQSh Saýda palatasy jańa tarıfter engizýge qarsylyq tanytyp, ımporttyń negizgi bes kózi «AQSh-tyń odaqtastary nemese jaqyn seriktesteri jáne AQSh-tyń ulttyq qaýipsizdigine qaýip tóndirmeıtin» Meksıka, Kanada, Japonııa, Germanııa jáne Fınlıandııa ekenin atap ótti.

Meksıka – AQSh-qa ortasha jáne aýyr júk kólikterin eń iri eksporttaýshy el.

Tarıfter sondaı-aq Meksıkada Ram júk kólikteri men kommertsııalyq fýrgondar jasaıtyn Chrysler-diń bas kompanııasy Stellantis STLAM.MI, sondaı-aq ashylýy 2026 jyly josparlanǵan Monterreıde (Meksıka) aýyr júk kóligi zaýytyn salyp jatqan shvetsııanyń Volvo Group VOLVb.ST kompanııasyna da áser etýi múmkin.

AQSh Halyqaralyq saýda basqarmasynyń málimetinshe, Meksıkada avtobýs, júk jáne traktor tirkemelerin shyǵaratyn jáne qurastyratyn 14 zaýyt, sondaı-aq qozǵaltqyshtar shyǵaratyn eki zaýyt ornalasqan.

Meksıka mamyr aıynda AQSh Saýda mınıstrligine AQSh-qa eksporttalatyn barlyq meksıkalyq júk kólikterinde orta eseppen 50% amerıkalyq quramdastar, sonyń ishinde dızeldik qozǵaltqyshtar bar ekenin málimdep, jańa tarıfterge qarsy boldy.

Meksıkanyń málimetinshe, ótken jyly AQSh Meksıkadan 128 mlrd dollarǵa jýyq somaǵa aýyr júk kólikteriniń bólshekterin ımporttady, bul AQSh ımportynyń shamamen 28%-yn quraıdy.

Buǵan deıin AQSh apellıatsııalyq soty Tramp tarıfteriniń kópshiligin zańsyz dep tapqanyn jazǵan bolatynbyz.