Tramp Dallastaǵy kisi óltirýden keıin ımmıgratsııalyq saıasatty kúsheıtpek
ASTANA. KAZINFORM – AQSh prezıdenti Donald Tramp Tehas shtatynyń Dallas qalasynda Chandra Mýlı Nagamallaııanyń óltirilýin «sumdyq» qylmys jáne ımmıgratsııalyq qatelikterdiń saldary dep atady, dep habarlaıdy FOX News.
- Men Tehas shtatyndaǵy Dallas qalasynyń qurmetti turǵyny Chandra Nagamallaııanyń óltirilgeni týraly jantúrshigerlik habardy estidim, bizdiń elimizde eshqashan bolmaýy tıis Kýbadan kelgen zańsyz ımmıgrant ony áıeli men ulynyń kózinshe qastandyqpen óltirdi, - dep jazdy Donald Tramp Truth Social áleýmettik jelisinde.
Shabýyl jasaǵan 37 jastaǵy Kýba azamaty Iordanıs Kobos-Martınes qala ortalyǵyndaǵy motelde Nagamalaııaǵa qanjarmen shabýyl jasap, áıeli men ulynyń kózinshe oǵan jaraqat salyp, basyn kesip tastaǵan.
Kýágerlerdiń aıtýynsha, zorlyq-zombylyq synǵan kir jýǵysh mashına men tildik kedergige qatysty daýdan keıin bastalǵan. Kobos-Martınes oqıǵa ornynda qamaýǵa alynyp, aýyr qylmys jasaǵany úshin aıyptaldy.
- Bul adam buryn balalardy jynystyq zorlyq-zombylyq, kólik urlaý jáne bostandyqtan zańsyz aıyrý sııaqty jantúrshigerlik qylmystary úshin qamaýǵa alynǵan, biraq Kýba óz elinde mundaı jaýyzdyń bolýyn qalamaýy sebebimen qabiletsiz Djo Baıden kezinde bosatyldy. Senimdi bolyńyz, bul zańsyz qylmystyq ımmıgranttarǵa jumsaqtyq tanytatyn ýaqyt aıaqtaldy, - dep habarlady AQSh prezıdenti.
Tramp qamaýdaǵy kúdiktiniń zań boıynsha jaýapqa tartylatynyn habarlady. Oǵan birinshi dárejedigi kisi óltirý áreketi boıynsha aıyp taǵylady.
Buǵan deıin Tramp ýkraındyq bosqyndy óltirgen adamdy ólim jazasyna kesýge shaqyrǵanyn jazǵan bolatynbyz.