Tramp Coca-Cola-ny AQSh-taǵy sýsyn quramyn ózgertýge kóndirdi

ASTANA. KAZINFORM – AQSh prezıdenti Donald Tramp Coca-Cola kompanııasy elde satylatyn sýsyndarda júgeri shárbatynyń ornyna qamys qantyn qoldanýǵa keliskenin málimdedi.

— Coca-Cola-men sóılesip, AQSh-taǵy sýsyndaryna tek qamys qantyn qosý týraly usynys jasadym. Olar kelisti. Bul — óte durys sheshim. Jaqyn arada nátıjesin kóresizder, — dep jazdy Tramp Truth Social platformasynda.

Kompanııa bul sheshimdi naqty rastaǵan joq. Alaıda Coca-Cola ókili prezıdent Tramptyń qyzyǵýshylyǵyna rızashylyq bildirip, jaqyn ýaqytta ónim jelisindegi jańa ınnovatsııalar týraly málimet taratylatynyn habarlady.

Aıta keteıik, AQSh-ta satylatyn Coca-Cola ónimderi kóbine júgeri shárbatymen táttilendirilse, Meksıka, Ulybrıtanııa jáne Avstralııa sııaqty elderde qamys qanty jıi qoldanylady.

AQSh Densaýlyq saqtaý mınıstri Robert Kennedı júgeri shárbaty, jasandy boıaǵyshtar men ósimdik maılary sııaqty ıngredıentterdiń zııany týraly birneshe ret málimdegen. Onyń «Make America Healthy Again» qozǵalysy azyq-túlik ónimderiniń quramyn jaqsartýdy kózdeıdi. Mınıstr bıylǵy jazda eldegi taǵamdyq standarttardy jańartýdy josparlap otyr.

Tramptyń bastamasy AQSh-taǵy júgeri óndirýshileriniń qarsylyǵyn týdyrdy. Júgeri óńdeýshiler qaýymdastyǵynyń basshysy Djon Boýdtyń aıtýynsha, mundaı ózgeris myńdaǵan jumys ornynyń qysqarýyna, fermerler tabysynyń tómendeýine jáne sheteldik qant ımportynyń artýyna alyp kelýi múmkin.

2024 jyldyń kókteminde Coca-Cola bas dırektory Djeıms Kýınsı ınvestorlarmen kezdesýde kompanııanyń qant mólsherin azaıtý jáne ónim assortımentin jańartý baǵytyndaǵy jumystary jalǵasyp jatqanyn aıtqan bolatyn.

Aıta keteıik, Tramp 150-den astam elge 10–15% baj salyǵyn salmaq.