Tramp Chıkago qalasyna 300 sarbazdy jiberý týraly buıryq berdi
ASTANA. KAZINFORM — AQSh Prezıdenti Donald Tramp Illınoıs shtatynyń Chıkago qalasyna 300 ulttyq gvardııa sarbazyn jiberýge sanktsııa berdi. Bul týraly Aq úıdiń baspasóz hatshysynyń orynbasary málimdedi, dep habarlaıdy DW.
Aq úıdiń ókili Ebıgeıl Djeksonnyń aıtýynsha, bul sheshim federaldyq qyzmetkerler men memlekettik nysandardyń qaýipsizdigin qamtamasyz etý maqsatynda qabyldanǵan.
— Prezıdent Tramp amerıkalyq qalalardy jaılaǵan zańsyzdyqqa kóz juma qaramaıdy, — dedi Djekson.
AFP agenttiginiń habarlaýynsha, Tramp bul sheshimdi birneshe apta boıǵy eskertýlerinen keıin, jergilikti bıliktiń qarsylyǵyna qaramastan qabyldaǵan.
Eske sala ketsek, qyrkúıek aıynda AQSh federaldyq bıligi eldiń birneshe qalasynda zańsyz mıgranttar men qylmyskerlerge qarsy arnaıy operatsııalar bastaǵan bolatyn. Bul sharalar Boston, Chıkago jáne Nıý-Iork bıliginiń narazylyǵyn týdyrǵan edi.
Mınıstrdiń málimdemesi
AQSh-tyń ishki qaýipsizdik mınıstri Krıstı Noem áleýmettik jeli X paraqshasynda Chıkagoda quqyq qorǵaý qyzmetkerlerine shabýyl jasalǵanyn habarlady.
— Qyzmetkerlerdiń kólikterin onǵa jýyq avtokólikpen bógep, sonyń birinde jartylaı avtomatty qarýmen qarýlanǵan shabýylshy bolǵan, — dedi mınıstr.
Onyń sózinshe, jaǵdaıdy baqylaý úshin arnaıy jasaqtyń qosymsha kúshteri jiberilgen.
— Kómek kele jatyr, — dep jazdy Noem.
Qaqtyǵystar jáne jaralanǵandar
4 qazanda Reuters agenttigi habarlaǵandaı, Chıkagonyń ońtústik-batys bóliginde bolǵan narazylyq kezinde AQSh Keden jáne shekara qyzmetiniń (ICE) qyzmetkerleri qarýly áıelge oq atqan. Bul oqıǵa federaldyq agentter men demonstranttar arasyndaǵy qaqtyǵystardan keıin bolǵan.
Zań ókilderiniń eshqaısysy aýyr jaraqat almaǵan. Áıeldiń kim ekeni anyqtalǵan joq, ol óz kúshimen aýrýhanaǵa jetkizilgen. Densaýlyǵy týraly málimet ázirge berilmedi. Agentter tártipsizdik kezinde kózden jas aǵyzatyn gaz jáne rezeńke oqtar qoldanǵan.
🇺🇸 Chicago Update: ICE shot a woman today in Brighton Park.
— the Pulse (@thePulseGlobal) October 4, 2025
DHS/ICE claim their vehicles were “boxed in” by ~10 cars, and that one driver was armed with a semi-automatic weapon.
Agents say they fired “defensive shots. Protests have erupted at the scene. pic.twitter.com/YQzDhSAI5J
ICE qyzmetine qarsy narazylyq
Tramptyń bıyl aqpanda Aq úıge qaıta oralýynan keıin AQSh-taǵy mıgratsııalyq saıasat qataıtylǵan bolatyn. Maýsym aıynda San-Frantsıskoda ICE qyzmeti júrgizgen reıdter jappaı narazylyqtar men tártipsizdikterge ulasqan.
Osyǵan jaýap retinde Tramp Kalıfornııaǵa júzdegen ulttyq gvardııa sarbazyn jáne teńiz jaıaý áskerlerin jibergen, bul sheshimge shtat bıligi qarsy shyqqan edi.
Mundaı aktsııalar Nıý-Iork, Ostın jáne Dallas qalalarynda da ótti. Nıý-Iorktegi demonstratsııalar kezinde «Olardy qaıtaryńdar!» uranymen Trump Tower ǵımaratynda mıtıng uıymdastyrylǵan.
Buǵan deıin Tramptyń sheshimimen Los-Andjeles pen Vashıngton qalalarynda da ulttyq gvardııa kúshteri jumyldyrylǵan bolatyn.