Tramp Charlz III-tiń qurmetine shotland vıskıin baj salyǵynan bosatty
ASTANA. KAZINFORM – Charlz III pen hanshaıym Kamıllanyń AQSh-qa jasaǵan tórt kúndik memlekettik sapary aıaqtaldy. AQSh prezıdenti Donald Tramp sapar sońynda Charlzdi «eń uly korol» dep atap, shotland vıskıine qatysty keıbir baj salyǵyn alyp tastaıtynyn málimdedi.
Beısenbi kúni jergilikti ýaqytpen koroldik jup Vashıngton mańyndaǵy Endrıýs áýe bazasynan Atlant muhıtyndaǵy brıtanııalyq aýmaq – Bagam araldaryna ushyp ketti.
Sapardyń sońǵy kúni Donald Tramp pen onyń jubaıy Charlz III pen Kamıllany Aq úıde saltanatty túrde shyǵaryp saldy. Budan keıin koroldik jup Vashıngton mańyndaǵy Arlıngton zıratynda Belgisiz sarbaz eskertkishine gúl shoǵyn qoıyp, keıin Vırdjınııa shtatyndaǵy qalada ótken kóshe merekesine qatysty.
Koroldik jupty shyǵaryp salǵannan keıin Tramp óziniń Truth Social jelisinde shotland vıskıine qatysty keıbir tarıfter men shekteýlerdi alyp tastaıtynyn jarııalady. Onyń aıtýynsha, bul sheshim Shotlandııa men Kentýkkı shtaty arasyndaǵy vıskı jáne býrbon óndirisi salasyndaǵy yntymaqtastyqty keńeıtýge baǵyttalǵan. Onyń ústine Tramptyń anasy Merı Maklaýd shotland ultynan bolǵan.
Óz kezeginde Býkıngem saraıynyń ókili korol Trampqa shynaıy alǵys bildirgenin jáne prezıdenttiń qurmetine «tost kóteretinin» aıtty.
Al Djon Sýınnı bul sheshimdi Shotlandııa úshin tamasha jańalyq dep baǵalap, koroldiń mańyzdy ról atqarǵanyn atap ótti.
Aıta keteıik, buǵan deıin Charlz III AQSh-qa 2007 jyldan beri alǵash ret memlekettik saparmen barǵanyn jazdyq.
