Tramp Charlı Kırktiń ólimine kúdiktiniń ustalǵanyn habarlady

ASTANA. KAZINFORM — AQSh prezıdenti Donald Tramp konservatıvti kommentator Charlı Kırktiń ólimine kúdikti adamnyń ustalǵanyn jarııalady, dep habarlaıdy BBC.

— Meniń oıymsha, biz ony ustadyq, yqtımaldyǵy óte joǵary, — dedi Aq úı basshysy Fox telekompanııasyna bergen suhbatynda.

Prezıdenttiń aıtýynsha, ol bul aqparatty efırge shyǵar aldynda bes mınýt buryn estigen. Tramp kúdiktini anyqtaýǵa oǵan óte jaqyn adam kómekteskenin jetkizdi.

— Bireý, oǵan óte jaqyn adam: «Bul sol» dedi. Kúdikti ákesine barǵan, al ákesi AQSh marshaldary qyzmetine júgingen. Ol senimdi adam, — dedi memleket basshysy.

Onyń sózinshe, kúdikti ózin ertip ákelgen ákesimen birge polıtsııa bólimine barǵan. Qazirgi ýaqytta ol sol jerde ustalyp otyr.

Tramp kúdiktiniń kim ekenin naqty atamady, tek jasyn 28 nemese 29-da dep kórsetti. Keıin New York Post gazeti onyń 22 jastaǵy ıÝta turǵyny ekenin jazdy.

— Barlyǵy ózgerýi múmkin, biraq faktiler bar, biz izdegen adamdy taptyq, — dep atap ótti AQSh prezıdenti.

Ol tergeýdiń basynda «eshqandaı aıǵaq bolmaǵanyn», tek beınejazbadan kúdiktige uqsas adamdy baıqaǵandaryn jetkizdi.

FBR jarııalaǵan beınejazbada izdestirilgen adam qastandyqtan soń ǵımarattyń tóbesimen qashyp bara jatyp, oqıǵa ornynan boı tasalaǵany kórinedi.

Tramp kúdikti kináli dep tanylsa, ol ólim jazasyna kesilýi tıis ekenin aıtty.

— Kırk eń jaqsy adam edi, ol mundaıǵa laıyq emes bolatyn, — dedi prezıdent.

Ol saıasatkerdiń jerleý rásimine baratynyn málimdep, qaza tapqan áriptesin este saqtaǵysy keletinin jetkizdi. Tramptyń aıtýynsha, Kırk oǵan «ulyndaı» bolyp, TikTok-pen aınalysýyna kómektesken.

Eske salsaq, 31 jastaǵy Charlı Kırk Tramptyń saılaýaldy naýqany kezinde basty odaqtasy bolǵan. Ol prezıdenttiń jeńiske jetýine yqpal etken. Kırk sársenbi kúni Utah Valley ýnıversıtetiniń kampýsynda sóz sóılep turǵan sátinde qastandyqpen atylyp óltirildi.

Donald Tramp Charlı Kırktiń qurmetine AQSh-taǵy memlekettik mekemelerde týlardy tómen túsirýdi buıyrdy.