Tramp BUU-ny synǵa aldy

ASTANA. KAZINFORM — AQSh Prezıdenti Donald Tramp Birikken Ulttar Uıymynyń óz áleýetin júzege asyra almaı otyrǵanyn synǵa aldy, dep habarlaıdy Kazinform tilshisi. 

Bas Assambleıada sóılegen sózinde Tramp uıymnyń shtab-páterindegi jumystyń olqylyqtaryn atap ótip, beıbitshilik ornatý isimen jalǵyz ózi aınalysyp júrgenin, óıtkeni BUU «jetkilikti jumys atqarmaıdy» dep málimdedi.

— Birikken Ulttar Uıymynyń maqsaty qandaı? Ol óz áleýetine tipti jaqyn da emes, — dedi AQSh Prezıdenti.

Tramp BUU-ny «eskirgen ári tıimsiz» uıym retinde sıpattap, eshkimniń kómeginsiz «jeti soǵysty toqtata alǵanyn» aıtty.

— Ókinishtisi, munyń bárin Birikken Ulttar Uıymynyń ornyna meniń isteýime týra keldi. Men jeti soǵysty toqtattym, sol elderdiń barlyq basshysymen sóılestim, biraq eshqashan BUU-nan kelisim jasaýǵa kómekteseıik degen qońyraý alǵan joqpyn, — dedi Tramp.

Onyń aıtýynsha, uıymnyń «zor áleýeti» bar, biraq ol soǵan saı emes.

Sonymen qatar Tramp klımattyń ózgerýimen kúres boıynsha BUU-nyń kúsh-jigerin synǵa alyp, ózge elderdi AQSh-tan energııa satyp alýǵa shaqyrdy jáne Amerıka álemniń kómirsýtekti energetıkadan bas tartýy úshin endi ózin qurban etpeıtinin aıtty. 

Aıta ketelik BUU Bas hatshysy Antonıý Gýterrısh BUU Bas Assambleıasynyń 80-sessııasynyń ashylýynda sóılegen kirispe sózinde adamzat klımattyq ádilettilikti tańdaýy tıis ekenin aıtty.