«Tramp buǵazy»: AQSh prezıdenti Ormýz buǵazyn qaıta ataýdy usyndy

Sársenbi kúni AQSh prezıdenti strategııalyq mańyzy bar sý joly AQSh baqylaýyna ótkenin málimdep, Ormýz buǵazyn «Tramp buǵazy» dep qaıta ataýdy usyndy.

— Endi ol AQSh baqylaýynda bolǵandyqtan, Ormýz buǵazyn «TRAMP BUǴAZY» dep qaıta ataýymyz kerek emes pe? Amerıkanyń ózi sııaqty, ol burynǵydan da «ystyq» bolady, — dep jazdy prezıdent Truth Social áleýmettik jelisinde.

Keıin Aq úı Parsy shyǵanaǵynyń kartasyn jarııalap, onda usynylǵan jańa ataýdy kórsetti. Alaıda birneshe saǵattan keıin Tramp buǵazdyń ataýyn ózgertý týraly usynysty mindetti túrde júzege asyrýdy kózdemeıtinin málimdedi.

— Bul jaı ǵana usynys edi, — dedi ol jýrnalıstiń Sopaqsha kabınettegi suraǵyna kúlip jaýap berip.

Álemdik munaıdyń shamamen besten bir bóligi Ormýz buǵazy arqyly tasymaldanady. Vashıngton bul teńiz joly AQSh baqylaýynda ekenin málimdese, Tegeran buǵazdyń is júzinde jabylǵanyn aıtyp otyr.

Bul málimdeme Ormýz buǵazy mańyndaǵy áskerı qımyldardyń qaıta shıelenisýinen keıin jasaldy. Seısenbi kúni AQSh kúshteri Iran aýmaǵyndaǵy nysandarǵa soqqy berip, Tegerandy sý aıdynyna mına ornatýǵa áreket jasady dep aıyptady. Buǵan jaýap retinde Iran óńirdegi AQSh áskerı bazalaryna shabýyl jasady.

Tramp óziniń ekinshi prezıdenttik merzimi kezinde halyqaralyq sý aıdyndarynyń geografııalyq ataýlaryn birneshe ret ózgertý týraly bastama kóterdi. Mundaı usynystardyń keıbiri basqa elderge qatysty ázil retinde jasalǵan.

Buǵan deıin Apple kompanııasy AQSh-taǵy paıdalanýshylarǵa arnalǵan Apple Maps kartografııalyq servısinde Ontarıo kóliniń ataýyn «Amerıka kóli» dep ózgertti. Bul Tramp sý aıdynynyń ataýyn ózgertý týraly jarlyqqa qol qoıǵannan keıin boldy.