Tramp Býdapeshtte Pýtınmen ázirge kezdespeıtinin málimdedi

ASTANA. KAZINFORM – AQSh prezıdenti Donald Tramp Reseı prezıdenti Vladımır Pýtınmen kezdesýdi keıinge qaldyrǵanyn habarlady, dep jazady Kazinform TASS agenttigine silteme jasap.

«Biz prezıdent Pýtınmen kezdesýdi toqtattyq. Bul qazir durys sheshim emes dep oıladym. Biz kútkendeı nátıje bermeıtinin sezdim. Sol sebepti kezdesýdi boldyrmadym. Biraq bolashaqta ony mindetti túrde ótkizemiz», dedi AQSh basshysy jýrnalısterge Aq úıde NATO Bas hatshysy Mark Rıýttemen ótken kezdesýden keıin.

Buǵan deıin Tramp Reseı prezıdenti Vladımır Pýtınmen kezdesetini jónindegi sheshimniń áli qabyldanbaǵanyn aıtqan. Keıinirek ol Býdapeshtte kelissóz ótkizý múmkindigin qarastyryp jatqanyn, al túpkilikti sheshim aldaǵy kúnderi qabyldanatynyn naqtylaǵan.

Batys BAQ-tarynyń habarlaýynsha, kelissózge daıyndyq jumystary ýaqytsha toqtatylǵan. Buǵan taraptardyń Ýkraınadaǵy qaqtyǵysqa qatysty ustanymdaryndaǵy aıyrmashylyqtar sebep bolǵan. Reuters jáne CBS News agenttikteriniń málimetinshe, Aq úı ókilderi eki el basshylarynyń kezdesýi «jaqyn ýaqytta josparlanbaǵanyn» rastaǵan.

Aıta ketsek, 16 qazanda Donald Tramp pen Vladımır Pýtın shamamen eki saǵatqa jýyq ýaqyt telefon arqyly sóılesti. Áńgime barysynda olar Ýkraına máselesi boıynsha kelissózderdiń ekinshi kezeńin ótkizý maqsatynda Býdapeshtte kezdesý múmkindigin qarastyrýǵa ýaǵdalasty.