Tramp BRIKS elderi dollardan bas tartqan jaǵdaıda baj salyǵy salynatynyn eskertti

ASTANA. KAZINFORM — AQSh-tyń jańadan saılanǵan prezıdenti Donald Tramp senbi kúni BRIKS-ke múshe elder AQSh dollaryna nuqsan keltiretin áreketterge barsa, osy memleketterge 100% baj salyǵyn qoıatynyn eskertti, dep habarlaıdy AP.

«Biz bul elderden BRIKS-tiń jańa valıýtasyn engizbeýdi nemese AQSh dollaryn almastyratyn kez kelgen basqa valıýtany qoldamaý týraly mindettemeni talap etemiz. Eger olar osyndaı qadamǵa barsa, 100 paıyzdyq baj salyǵyna tap bolady jáne AQSh-tyń qýatty ekonomıkasymen saýda-sattyq jasaýdan shettetiledi», - dedi Tramp Truth Social saıtyndaǵy jazbasynda.

Onyń osy málimdemesi Brazılııa, Reseı, Úndistan, Qytaı jáne Ońtústik Afrıka kiretin BRIKS alıansy dep atalatyn elderge baǵyttalǵan. Bul elderden basqa alıans quramyna Mysyr, Efıopııa, Iran jáne Birikken Arab Ámirlikteri qosyldy.

Sonymen qatar birneshe memleket BRIKS-ke qosylý týraly ótinishterin berdi.

AQSh dollary jahandyq bızneste eń kóp qoldanylatyn valıýta sanalǵanymen, alıans músheleri men basqa da damýshy elder Amerıkanyń jahandyq qarjy júıesindegi ústemdiginen sharshaǵanyn alǵa tartyp otyr.

Buǵan deıin Donald Tramp Qytaı, Meksıka jáne Kanada taýarlaryna jańa tarıf engizýdi josparlap otyrǵanyn jarııalady.