Tramp Brazılııadan keletin ımportqa kedendik baj salyǵyn 50%-ǵa deıin kóterdi

ASTANA. KAZINFORM – AQSh prezıdenti Donald Tramp Brazılııadan keletin taýarlar men qyzmetterge salynatyn kedendik baj salyǵyn 50 paıyzǵa deıin arttyrýdy kózdeıtin jarlyqqa qol qoıdy, dep habarlaıdy TASS.

Aq úıdiń baspasóz qyzmetiniń málimetinshe, qujatta Brazılııa úkimetiniń áreketteri AQSh-tyń ulttyq qaýipsizdigine, syrtqy saıasaty men ekonomıkasyna qater tóndiredi delingen.

Sondaı-aq jarlyqta bul shara Brazılııanyń burynǵy prezıdenti Jaır Bolsonarýǵa qatysty óz elinde ótip jatqan sot protsesimen baılanysty ekeni atap ótilgen. AQSh tarapy bul isti «saıası astary bar» dep baǵalap otyr.

Aıta keteıik, shilde aıynyń basynda Donald Tramp Brazılııadan keletin taýarlarǵa 50 paıyzdyq tarıf engizý josparyn jarııalaǵan bolatyn.