Tramp Beıbitshilik salasyndaǵy Nobel syılyǵyn almady, ol venesýelalyq áıelge berildi

ASTANA.KAZINFORM - 2025 jylǵy Beıbitshilik salasyndaǵy Nobel syılyǵy Venesýela saıasatkeri Marııa Korına Machadoǵa «Venesýela halqynyń demokratııalyq quqyqtaryn qamtamasyz etýdegi tynymsyz qyzmeti jáne dıktatýradan demokratııaǵa ádil ári beıbit jolmen ótý jolyndaǵy kúresi úshin» berildi, dep habarlaıdy DW.

Machado 2012 jylǵy Venesýela saılaýynda prezıdenttikke úmitker boldy jáne 2014 jyly Nıkolas Madýro úkimetine qarsy narazylyq kezinde basty tulǵa boldy.

Bıyl qurmetti syılyqqa 338 tulǵa men uıym usynyldy. Alaıda sońǵy birneshe aptada Trampqa syılyq berile me, joq pa degen basty másele boldy. AQSh prezıdentiniń ózi «syılyqqa laıyq ekenin jáne ony bermeý AQSh-ty qorlaý» bolatynyn birneshe ret málimdedi.

Izraıl-HAMAS kelisiminen keıin býkmekerlik keńseler Tramptyń koeffıtsıentin arttyrdy, biraq laýreat týraly sheshim kelisim jasalǵanǵa deıin qabyldanǵan. Komıtet Izraıl-HAMAS kelisiminiń 2025 jylǵy laýreatty tańdaýǵa «múldem áser etpeıtinin» atap ótti.

Esterińizge sala keteıik, Nobel aptalyǵy 6 qazanda bastaldy. Sol kúni fızıologııa jáne medıtsına salasyndaǵy Nobel syılyǵy ımmýnıtet júıesin zerttegen ǵalymdarǵa berildi.

7 qazanda AQSh ǵalymdaryna fızıka boıynsha Nobel syılyǵy berildi.

9 qazanda ádebıet boıynsha Nobel syılyǵy vengr jazýshysy Laslo Krasnahorkaıǵa berildi.

13 qazanda 1968 jyly Shvetsııa banki qurǵan ekonomıka ǵylymdary boıynsha Alfred Nobel memorıaldyq syılyǵynyń laýreaty belgili bolady.